Xi Jinping: మాస్కోలో పుతిన్‌తో భేటీకానున్న జీ జిన్‌పింగ్‌..

Xi Jinping: జీ జిన్‌పింగ్ వ‌చ్చే వారం ర‌ష్యాలో ప‌ర్య‌టించ‌నున్నారు. మాస్కోలో ఆయ‌న పుతిన్‌తో భేటీ అవుతారు. ఇరు దేశాల మ‌ధ్య కీల‌క అంశాల‌పై ఒప్పందాలు జ‌ర‌గ‌నున్నాయి. ఉక్రెయిన్ వార్ నేప‌థ్యంలో ఈ భేటీ కీల‌కంకానున్న‌ది.

మాస్కో: చైనా అధ్య‌క్షుడు జీ జిన్‌పింగ్‌(Xi Jinping).. వ‌చ్చే వారం మాస్కోలో ర‌ష్యా అధ్య‌క్షుడు పుతిన్‌(Putin)తో భేటీకానున్నారు. ఈ విష‌యాన్ని అధికారులు వెల్ల‌డించారు. ఆ భేటీలో స‌మ‌గ్ర‌మైన భాగ‌స్వామ్య‌, వ్యూహాత్మ‌క స‌హ‌కారం గురించి చ‌ర్చించ‌నున్న‌ట్లు ర‌ష్యా అధికారులు వెల్ల‌డించారు. ఉక్రెయిన్‌తో జ‌రుగుతున్న యుద్ధాన్ని ఆపేందుకు ప్ర‌య‌త్నిస్తున్న‌ట్లు ఇటీవ‌ల చైనా ప్ర‌క‌టించిన విష‌యం తెలిసిందే. ఈ నేప‌థ్యంలో ఆ ఇద్ద‌రి భేటీకి ప్రాధాన్య‌త సంత‌రించుకున్న‌ది. కానీ ప‌శ్చాత్య దేశాలు మాత్రం చైనాపై ఆగ్ర‌హంగా ఉన్నాయి. డ్రాగ‌న్ దేశం ర‌ష్యాకు ఆయుధాల‌ను స‌ర‌ఫ‌రా చేస్తున్న‌ట్లు ఆరోపిస్తున్నాయి.

పుతిన్ అందించిన ఆహ్వానం మేర‌కు.. మార్చి 20 నుంచి 22 వ‌ర‌కు జీ జిన్‌పింగ్ మాస్కోలో పర్య‌టిస్తార‌ని చైనా విదేశాంగ శాఖ(China Foreign Ministry) అధికారులు తెలిపారు. ఇద్ద‌రు నేత‌లు ప‌లు ద్వైపాక్షిక డాక్యుమెంట్ల‌పై సంత‌కాలు చేయ‌నున్నారు. ఫ్రెండ్‌షిప్‌, పీస్ ఉద్దేశంతో ఆ ట్రిప్ సాగ‌నున్న‌ట్లు చైనా విదేశాంగ శాఖ పేర్కొన్న‌ది. జీ జిన్‌పింగ్‌ను తాను కూడా క‌ల‌వాల‌నుకుంటున్న‌ట్లు ఉక్రెయిన్ అధ్య‌క్షుడు జెలెన్‌స్కీ(Zelensky) ఫిబ్ర‌వ‌రిలో ప్ర‌క‌టించిన విష‌యం తెలిసిందే.