చరిత్రలో ఈరోజు : చందమామపై పరిశోధనలో భారత్‌ సువర్ణధ్యాయం

Today History : అంతరిక్ష పరిశోధనల్లో మనకంటూ ప్రత్యేక అధ్యాయాన్ని లిఖించుకున్నాం. భారతదేశం చేపట్టిన చంద్రయాన్‌-1 విజయవంతమై 2008 లో సరిగ్గా ఇదే రోజున...

November 14, 2021 / 02:50 PM IST

చరిత్రలో ఈరోజు : చందమామపై పరిశోధనలో భారత్‌ సువర్ణధ్యాయం

(Today History) : అంతరిక్ష పరిశోధనల్లో మనకంటూ ప్రత్యేక అధ్యాయాన్ని లిఖించుకున్నాం. భారతదేశం చేపట్టిన చంద్రయాన్‌-1 విజయవంతమై 2008 లో సరిగ్గా ఇదే రోజున మన అంతరిక్ష నౌక చంద్రుడి ఉపరితలంపై దిగింది. దీని ద్వారా అంతరిక్ష పరిశోధనలో భారతదేశ ఆధిపత్యం పెరిగింది. చంద్రయాన్‌ ప్రయోగం విజయవంతం కావడంతో చంద్రుడి ఉపరితలంపై కాలిడిన నాలుగో దేశంగా భారత్‌ అవతరించింది. అంతకు ముందు అమెరికా, రష్యా, జపాన్ దేశాలు మాత్రమే ఈ పనిని సాధించగలిగాయి.

ఇండియన్ స్పేస్ రీసెర్చ్ ఆర్గనైజేషన్ (ఇస్రో) తన అంతరిక్ష కార్యక్రమాన్ని ప్రారంభించిన 45 సంవత్సరాల తర్వాత మిషన్ మూన్ చేపట్టింది. 2008 అక్టోబరు 22న చంద్రయాన్‌-1 ప్రారంభమై.. 2009 ఆగస్టు 30 వరకు చంద్రుని కక్ష్యలో ఉన్నది. ఈ మిషన్‌లో ప్రత్యేకంగా మూన్‌ ఇంపాక్ట్‌ ప్రోబ్‌ (ఎంఐపీ) పరికరాన్ని పంపగా.. అది చంద్రుడి ఉపరితలంపై నీటిని కనుగొన్నది. ఇది చాలా పెద్ద ఆవిష్కరణ అని, తొలి ప్రయత్నంలోనే ఈ ఆవిష్కరణ చేపట్టడం పట్ల అమెరికన్ స్పేస్ సైన్స్ ఆర్గనైజేషన్ (నాసా) భారతదేశాన్ని ప్రశంసల్లో ముంచెత్తింది.

చంద్రయాన్-1 ఇస్రో మూన్ మిషన్ మొదటి వాహనం. చంద్రుడిని చేరుకోవడానికి 5 రోజులు.. చంద్రుడి చుట్టూ తిరగడానికి 15 రోజుల సమయం పట్టింది. ఈ ఎంఐపీని భారత మాజీ రాష్ట్రపతి, ప్రసిద్ధ శాస్త్రవేత్త ఏపీజే అబ్దుల్ కలాం రూపొందించారు. భారతీయ శాస్త్రవేత్తలు చంద్రుడి ఒక భాగంపై ముద్ర వేయాలని అబ్దుల్‌ కలాం గట్టిగా కోరుకున్నారు. అందుకు తగినట్లుగానే ఇస్రోలోని భారతీయ శాస్త్రవేత్తలు నిర్విరామ కృషి సలిపి చంద్రయాన్‌-1 ను విజయవంతం చేశారు.