Bird Flu | మరో వ్యక్తికి బర్డ్ ఫ్లూ సోకింది. అమెరికాలో ఓ వ్యక్తికి బర్డ్ ఫ్లూ సోకడం ఇది రెండోసారి. మిచిగాన్లోని ఓ రైతుకు ఈ బర్డ్ఫ్లూ సోకినట్లుగా డిపార్ట్మెంట్ ఆఫ్ హెల్త్ అండ్ హ్యూమన్ సర్వీసెస్ (MDHHS) పేర్కొంది. సెంటర్స్ ఫర్ డిసీజ్ కంట్రోల్ అండ్ ప్రివెన్షన్ (CDC) H5N1 సోకిన వ్యక్తి డెయిరీ ఫామ్లో పని చేస్తున్నట్లుగా తెలిపింది. సదరు వ్యక్తిలో స్థానిక అధికారులు బర్డ్ఫ్లూ లక్షణాలను గుర్తించినట్లు సీడీసీ పేర్కొంది. బాధితుడి రెండు రెండు శాంపిల్స్ సేకరించామని.. ఒకటి ముక్కు నుంచి, మరొకటి బాధితుడి కంటి నుంచి సేకరించినట్లు పేర్కొంది.
ముక్కు నుంచి తీసిన శాంపిల్ను రాష్ట్ర ఆరోగ్య శాఖ ల్యాబొరేటరీకి పంపగా, ఇన్ఫ్లుఎంజా వైరస్ నెగిటివ్గా తేలింది. కంటి నమూనాను సీడీసీకి పంపగా.. అక్కడ ఏ (H5) వైరస్గా నిర్ధారించారు. మళ్లీ నాసికా నమూనాను సేకరించి సీడీసీకి పంపారు. ప్రస్తుతం అతని ఆరోగ్య పరిస్థితి బాగనే ఉందని ఎండీహెచ్ఎస్ పేర్కొంది. ఇంతకు ముందు తొలిసారిగా ఏప్రిల్లో టెక్సాస్ ఓ వ్యక్తికి బర్డ్ఫ్లూ పాజిటివ్గా తేలింది. ఈ వ్యక్తి సైతం బర్డ్ఫ్లూ సోకిన ఆవులకు దగ్గర ఉండడంతో సోకినట్లుగా గుర్తించారు. ఆవుల నుంచి మనిషికి బర్డ్ఫ్లూ సోకిన మొదటి కేసు ఇదే. వ్యక్తి శరీరంలో కనిపించే వైరస్ దాదాపు టెక్సాస్లోని ఆవులు, పక్షులలో కనిపించే వైరస్లానే ఉంటుందని పేర్కొన్నారు. దీన్ని నివారించేందుకు పౌల్ట్రీ, డెయిరీ ఫామ్లలో పనిచేసే వ్యక్తులు ఫ్లూ టీకాలు వేయాలని ఎండీహెచ్హెచ్ఎస్ సూచించింది.