వాషింగ్టన్: అమెరికా గగన తలంపై ఎగురుతున్న చైనా నిఘా బెలూన్ (Spy balloon) కలకలం సృష్టిస్తున్న విషయం తెలిసిందే. తాజాగా మరో హై ఆల్టిట్యూడ్ బెలూన్ను అమెరికా రక్షణ శాఖ ప్రధాన కార్యాలయం పెంటగాన్ గుర్తించింది. ఇది తమ పొరుగునే ఉన్న లాటిన్ అమెరికా గగనతలంలో ఎగురుతున్నదని వెల్లడించింది. దానిని చైనాకు సంబంధించిన నిఘా బెలుగా గుర్తించినట్లు పెంటగాన్ ప్రెస్ కార్యదర్శి బ్రిగేడియర్ జనరల్ పాట్రిక్ రైడర్ తెలిపారు. అయితే అది కచ్చితంగా ఎక్కడ ఉందనే విషయంపై స్పష్టత లేదని పేర్కొన్నారు. అది అమెరికా దిశగా కదులుతున్నట్లు కనిపించడంలేదని చెప్పారు. మరికొన్ని రోజుల్లో తమ దేశంలోకి ప్రవేశించే అవకాశం ఉందన్నారు.
కొన్ని రోజుల నుంచి తమ దేశ గగన తలంపై చైనా ‘నిఘా బెలూన్’ ఎగురుతున్నదని అమెరికా అధికారులు ప్రకటించిన విషయం తెలిసిందే. అధ్యక్షుడు జో బైడెన్ అభ్యర్థన మేరకు దీన్ని కూల్చేయాలని రక్షణ కార్యదర్శి ఆస్టిన్ అనుకున్నా, కింద ఉండే చాలా మంది ప్రజలకు దాని వల్ల ప్రమాదం కలుగుతుందని భావించి ఆ ఆలోచన విరమించుకున్నారు. వాయువ్య అమెరికాలోని భూ గర్భంలో సున్నితమైన ఎయిర్బేస్లు, వ్యూహాత్మక అణు క్షిపణులు ఉన్న ప్రాంతంలో చైనా బెలూన్ ఎగురుతున్నదని అమెరికా అధికారులు తెలిపారు. ఇంటలిజెన్స్ సమాచార సేకరణలో ఈ బెలూన్కు తక్కువ సామర్థ్యం ఉన్నట్టు తెలుసుకున్నామని వెల్లడించారు.