పండ్లు, పూలు, కూరగాయల మొక్కల పెంపకం
గుంతల ఏర్పాటు, ఏపుగా పెరిగిన పచ్చటి చెట్లు
పరిశుభ్రతకు పెద్దపీట కెమెరాల ఏర్పాటు
శాతం మురికి కాలువలు, 50 శాతం సీసీ రోడ్ల నిర్మాణం
ఆదర్శంగా నిలుస్తున్న దమ్మాయిగూడ 8వ వార్డులోని ఎల్ఎన్ఆర్ కాలనీ
మేడ్చల్ కలెక్టరేట్ : ఆ కాలనీకి వెళ్తే ఆహ్లాదం ఆహ్వానిస్తుంది.. ఆనందం వెల్లివెరుస్తుంది. అక్కడ ఇంటింటికీ పూలు, పండ్ల మొక్కలు, కూరగాయలు పండిస్తారు. అంతేకాదు ఏపుగా పెరిగిన పచ్చటి పొదరిల్లులు ఇతర కాలనీలకు స్ఫూర్తి కలిగిస్తున్నాయి. నీటి అవసరాలకు ప్రతి ఇంటి వద్ద ఇంకుడు గుంతలు, దొంగతనాల నివారణకు ప్రధాన రోడ్ల వెంట సీసీ కెమెరాల ఏర్పాటు ఇలా గ్రామీణ వాతావరణాన్ని తలపించేలా చేపడుతున్న ఎన్నో కార్యక్రమాలు ఆ కాలనీని మరింత ఆదర్శవంతంగా తీర్చిదిద్దుతున్నది. అదే దమ్మాయిగూడ మున్సిపాలిటీ పరిధిలోని 8వ వార్డులోని ఎల్ఎన్ఆర్ కాలనీ.
దమ్మాయిగూడ మున్సిపాలిటీ పరిధిలోని 8వ వార్డులో 12 ఏండ్ల కిందట ఎల్ఎన్ఆర్ కాలనీ ఏర్పడింది. అక్కడ 200ఇండ్లను నిర్మించారు. మొత్తం 800 జనాభా ఉండగా, 600 ఓటర్లు ఉన్నారు. కాలనీలో 1350 మీటర్లు మురికి కాలువలు నిర్మించి 100 శాతం అంతర్గత మురికి కాలువ పనులను పూర్తిచేశారు. 600 మీటర్ల మేరకు సీసీ రోడ్డు పనులు చేయడంతో 50 శాతం సీసీ రోడ్డు పనులు పూర్తయ్యాయి. ఇటీవల భారీ వర్షాలకు కాలనీ ప్రహరీ కూలిపోతే వార్డు కౌన్సిలర్ సంపనబోలు స్వప్న హరిగౌడ్ తన సొంత నిధులతో ప్రహరీ నిర్మించారు. కాలనీలో ఇటీవల రూ. 6 లక్షలతో సీసీ రోడ్డు నులు పూర్తి చేశారు.
కాలనీలో 200 ఇండ్లు ఉండగా ప్రతి ఇంటి ఆవరణలో పండ్లు, పూల మొక్కలతో పాటు, కాయగూరలు, ఆకుకూరల మొక్కలు దర్శనం ఇస్తాయి. జామ, మామిడి, అరటి, ఉసిరి, నేరేడు, దానిమ్మ, ద్రాక్ష, మందార, గులాబి, బంతి, చామంతితోపాటు వంకాయ, టమాట, పాలకుర, మెంతం తదితర పంటలు ఇంటి ఆవరణలో పండిస్తున్నారు.
కాలనీలో నీటి కష్టాలు రాకుండా ఉండేందుకు ప్రతి ఇంటి ఆవరణలో ఇంకుడు గుంతలను నిర్మించారు. వర్షాలు కురిసినప్పుడు వర్షపు నీరు వృథాగా పోకుండా చర్యలు తీసుకుంటున్నారు.
కాలనీలో సంక్షేమ సంఘం ఆధ్వర్యంలో కాలనీలో 32 సీసీ కెమెరాలను ఏర్పాటు చేసి దొంగతనాలను పూర్తిగా నివారించారు. సీసీ కెమెరాలు లేని సమయంలో అనేక దొంగతనాలు జరిగేవి. సీసీ కెమెరాలను ఏర్పాటు చేసిన అనంతరం కాలనీలో ప్రజలు ప్రశాంతంగా నిద్రిస్తున్నారు.
కాలనీలో సంక్షేమ సంఘం ఆధ్వర్యంలో ఉచిత వైద్య శిబిరాలు నిర్వహిస్తారు. కరోనా సమయంలో కాలనీలో నెల రోజుల పాటు అన్నదాన కార్యక్రమాలు నిర్వహించారు. ఇండ్లలో శుభకార్యాలు చేస్తే అనాథాశ్రమంలో నిత్యావసర సరుకులు అందజేస్తారు. కాలనీలో అన్నదాన కార్యక్రమాలు నిర్వహిస్తారు. ప్రతి నెల కాలనీ సంక్షేమ సంఘం భవనంలో సమావేశాలు నిర్వహిస్తారు. వార్డు కౌన్సిలర్ సంపనబోలు స్వప్న హరిగౌడ్ కాలనీలో సంక్షేమ భవనాన్ని సొంత నిధులతో కొనుగోలు చేసి కాలనీకి అందజేశారు.
కాలనీలో ప్రతి ఇంటి ఆవరణలో పండ్లు, పూల మొక్కలు పెంచుతారు. ప్రతి ఒక్కరు మొక్కలు నాటి వాటిని రక్షించుకోవాలి. ఇంటి ఆవరణలో మొక్కలు నాటితే ఆహ్లాదంతో పాటు ఆరోగ్యం. కాలనీలో పండ్ల, పూల మొక్కలతో చిన్న అడవిలా కనిపిస్తున్నది. ఎండా కాలంలో ఇంటి ఆవరణలో ఉన్న చెట్లు, మొక్కలతో వేడి చాలా తక్కువగా ఉంటుంది. ప్రస్తుతం పచ్చగా కనిపిస్తుండడంతో పాటు చక్కటి గాలిలో చెట్ల కింద సేదతీరుతాము. – రాజమణి, ఎల్ఎన్ఆర్ కాలనీ, దమ్మాయిగూడ
కాలనీలో పూర్తి స్థాయిలో మురికి కాలువలు 100 శాతం నిర్మించారు. సీసీ రోడ్లు 50 శాతం మేరకు పూర్తి చేసినప్పటికి ఇంకా 50 శాతం సీసీ రోడ్లు వేయాలి. కాలనీ సంక్షేమ ఆధ్వర్యంలో అనేక సేవా కార్యక్రమాలు, సీసీ కెమెరాల నిర్వహణ ఉంటుంది. – శ్రీనివాస్, ఎల్ఎన్ఆర్ కాలనీ, దమ్మాయిగూడ