ఫ్లాయిడ్‌ హంతకుడికి 22.5 ఏండ్ల జైలు

మినియా పోలీస్‌: నల్లజాతీయుడు జార్జ్‌ ఫ్లాయిడ్‌ను అత్యంత దారుణంగా హత్య చేసిన శ్వేతజాతి పోలీసు అధికారి డెరెక్‌ చావిన్‌కు ఎట్టకేలకు అమెరికా కోర్టు శిక్ష విధించింది. 22.5 ఏండ్ల జైలుశిక్ష విధిస్తూ శనివారం తీర్పు చెప్పింది. నల్లజాతీయులను చంపిన కేసుల్లో అమెరికా పోలీసు అధికారికి ఇంత సుదీర్ఘకాలం జైలు శిక్ష పడటం ఆ దేశంలో అరుదైన విషయం. అయితే, ఈ తీర్పుపై ఫ్లాయిడ్‌ కుటుంబసభ్యులతోపాటు పలువురు తీవ్ర అసంతృప్తి వ్యక్తం చేశారు. గరిష్ఠ శిక్ష అయిన 40 ఏండ్ల జైలు విధించాలని వారు న్యాయమూర్తిని కోరారు. డెరెక్‌కు 22.5 ఏండ్ల జైలుశిక్ష విధించినప్పటికీ.. జైలులో ‘సత్ప్రవర్తన’ కలిగి ఉంటే 2/3 వంతు శిక్షాకాలాన్ని (15 ఏండ్లు) పూర్తిచేసుకొని బయటపడే అవకాశం ఉంది. కాబట్టి, డెరెక్‌ నేరానికి ఇది ఎంతమాత్రం తగిన శిక్ష కాదని పలువురు అభిప్రాయపడుతున్నారు. గతేడాది ఫ్లాయిడ్‌ మెడపై డెరెక్‌ మోకాలిని తొక్కిపెట్టడంతో ఊపిరాడక అతడు ప్రాణాలు కోల్పోయిన సంగతి తెలిసిందే.