హైదరాబాద్: ప్రయాణికులకు మౌలిక సదుపాయాల కల్పన, సామర్థ్యం పెంపు, మెరుగైన భద్రత చర్యల కోసం దక్షిణ మధ్య రైల్వే నిరంతరంగా కృషి చేస్తోంది. అందులో భాగంగా ఎస్సీఆర్ జోన్ నెట్వర్క్ పరిధిలో అన్ని రైల్వే లైన్ల విద్యుధీకరణ పనులకు అత్యంత ప్రాధాన్యత ఇస్తున్నది. కొనసాగింపుగా ఉందానగర్-గొల్లపల్లి మధ్య 60 కి.మీ డబుల్ లైన్ విద్యుదీకరణ పనులను పూర్తి చేసింది. ఇది హైదరాబాద్ నుంచి కర్నూల్, అనంతపురం, బెంగళూరు, కడప, తిరుపతి వంటి ప్రధాన నగరాలతో అనుసంధానించడంలో కీలకమైనది. ఈ ప్రాజెక్టు రైల్వే పీఎస్యూ, రైల్ వికాస్ నిగమ్ లిమిటెడ్ ఆధ్వర్యంలో కొనసాగుతుందని శనివారం ఎస్సీఆర్ అధికారులు ప్రకటించారు.
తెలంగాణ రాష్ట్రంలో రైళ్ల నిర్వహణ బలోపేతానికి సికింద్రాబాద్-మహబూబ్నగర్ డబ్లింగ్, విద్యుదీకరణ ప్రాజెక్టు అత్యంత కీలకమైనది. 85 కి.మీ నిడివి ఉన్న ఈ ప్రాజెక్టు రూ.774 కోట్ల అంచనా వ్యయంతో 2015-16లో మంజూరు చేశారు. సికింద్రాబాద్-ఉందానగర్ మధ్య 28 కి.మీ ప్రాజెక్టు నుంచి మినహాయించబడింది. అయితే దీనిని ఎంఎంటీఎస్ రెండో దశ కింద ప్రాజెక్టు చేపట్టడంతో పాటు ఆ మేరకు పనులు చేశారు.