వాహనదారులూ.. ఆర్టీఏలో మీ మొబైల్ నంబర్ను లింక్ చేసుకున్నారా…ఇంకా చేసుకోలేదా…అయితే వెంటనే చేసుకోండి. లేదంటే చలాన్లు పడిన విషయం మీకు తెలియకుండా పోతుంది. అది మీకు కొండంత భారమూ కావొచ్చు.. మనం వాహనాలను ఎవరికైనా ఇచ్చినప్పుడు వారు ట్రాఫిక్ నిబంధనలు ఉల్లంఘిస్తే.. జరిమానాలు వేస్తారు…ఫోన్ నంబర్ లింక్ లేకపోతే..ఎన్ని చలాన్లు పడ్డాయో కూడా తెలియదు. ఎక్కువ మొత్తంలో ఉంటే.. గుదిబండలా మారుతుంది. అవి చెల్లించకపోతే చట్టపరమైన చర్యలూ ఎదుర్కోవాల్సి వస్తుందని ట్రాఫిక్ పోలీసులు హెచ్చరిస్తున్నారు.
ఇటీవల గచ్చిబౌలిలో సైబరాబాద్ ట్రాఫిక్ అధికారులు ఓ ద్విచక్రవాహనాన్ని ఆపారు. అతని చలాన్లు చూస్తే దాదాపు రూ. 20 వేలపైనే ఉన్నది. అసలు వాహన యజమాని గురించి ఆరా తీశారు. అతనిని పిలిపించి మీ వాహనం మీద రూ. 20 వేల చలాన్ ఉంది. వాటికి కూడా గడువు తీరింది. ఇప్పుడు మీ వాహనాన్ని సీజ్ చేయాల్సి ఉంటుందని చెప్పారు. అయితే తనకు చలాన్ల విషయం తెలియదని… అవసరాల కోసం మా పక్కింటిలో ఉంటున్న యువకుడికి ఇచ్చానని వివరించాడు. ఇన్ని జరిమానాలు ఎందుకు వచ్చాయని ఆరా తీస్తే..ఆ యువకుడు రాంగ్ రూట్లో వెళ్లి వేగంగా తిరిగి రావడం చేశాడు. దీంతో ట్రాఫిక్ పోలీసులు ఫొటోలు కొట్టి..చలాన్లు వేశారు. నంబర్ లింక్ లేకపోవడంతో యజమానికి ఎన్ని చలాన్లు పడ్డాయో కూడా తెలియకుండా పోయింది.
ప్రతి వాహనదారుడు ఆర్టీఏ రికార్డుల్లో తన ఫోన్ నంబరును జోడించుకోవాలి. వాహనం కొన్నప్పుడు ఒక నంబర్ ఇస్తాం. ఒకవేళ అది మారితే.. వెంటనే అప్డేట్ చేసుకోవాలి. పాత వాహనాలను కొన్నప్పుడు కూడా ఈ ప్రక్రియ తప్పనిసరి అని ట్రాఫిక్ పోలీసులు సూచిస్తున్నారు. ఇలా చేసుకుంటే మీకు చలాన్ల సమాచారం ఎప్పటికప్పుడు తెలిసిపోతుంది. ఒక వేళ జరిమానా తప్పుగా పడినా.. వెంటనే అప్రమత్తమై.. ఆ సమాచారాన్ని ట్రాఫిక్ అధికారులు, లేదా పోలీస్, ఆర్టీఏ వెబ్ సైట్లలో ఫిర్యాదు చేసుకోవచ్చు.
మాదాపూర్లో ఓ యువకుడు ట్రిపుల్ రైడింగ్, రాంగ్రూట్లో ప్రయాణిస్తుంటే.. ట్రాఫిక్ పోలీసులు ఆపి.. చలాన్లు తనిఖీ చేశారు. దాదాపు రూ. 42 వేల వరకు నగదు పెండింగ్లో ఉన్నది. యజమానిని పిలిపిస్తే కంగుతిన్నాడు. ఈ చలాన్లు చెల్లించాలంటే.. తన వాహనం అమ్మినా.. అంత డబ్బు రాదని వాపోయాడు. అతనికి కొంత వయసు భారం ఉండటంతో కొన్ని పనులకు తెలిసిన వారికి వాహనాన్ని ఇచ్చాడు. అలా ఓ యువకుడు ట్రిపుల్ రైడింగ్తో పాటు రాంగ్రూట్లో ప్రయాణించాడని తేలింది. దీనికి తోడు ఆర్టీఏలో ఫోన్ నంబర్ లింక్ చేసుకోకపోవడంతో జరిమానాల సంగతి యజమానికి తెలియలేదు.
ఎవరికైనా మన వాహనం ఇచ్చినప్పుడు అతనికి డ్రైవింగ్ లైసెన్స్ ఉందా లేదా అనే విషయాన్ని కచ్చితంగా తెలుసుకోవాలి. లేదంటే అతని డ్రైవింగ్ వల్ల ఏదైనా ప్రమాదం జరిగినా.. ఆ ప్రమాదంలో ఎవరైనా మరణించినా.. యజమానిపై కేసు తప్పదంటున్నారు పోలీసులు. మనం నిబంధనలను ఉల్లంఘించినా.. ఆ సమాచారం మనకు తెలియాలంటే కచ్చితంగా ఆర్టీఏ రికార్డుల్లో మన ఫోన్ నంబర్ రిజిస్టర్ అయ్యి ఉండాలి. మీ వాహనం మీద చలాన్ జారీ అయిన విషయాన్ని తెలుసుకోవాలంటే వెంటనే https://tgtransport.net/TGCFSTONLINE/OnlineTransactions/UpdateMobileNumber.aspx సంప్రదించాలి. అలాగే ఈ లింక్ ద్వారా ఫోన్ నంబర్ కూడా నమోదు చేసుకోవచ్చని సూచిస్తున్నారు. నంబర్ మారినా.. వెంటనే అప్డేట్ చేసుకోవాలని పోలీసులు విజ్ఞప్తి చేస్తున్నారు.