తాను వండింది.. నలుగురికి పంచుతూ

• ఓ వైపు ఉద్యోగం చేస్తూనే మరోవైపు సమాజ సేవకు కదిలిన యువతి
• ఇన్‌స్టాగ్రాంలో కుక్‌ వేదికగా కొవిడ్‌ రోగులకు సేవలు
• స్నేహితులతో కలిసి నగర వ్యాప్తంగా బలవర్థక ఆహారం పంపిణీ

హఫీజ్‌పేట్‌, మే 4: ఓ వైపు ఉద్యోగం చేస్తూనే మరోవైపు సమాజ సేవకు కదులుతున్నది ఓ యువతి. ఇన్‌స్టాగ్రాం వేదికగా ‘కుక్‌’ పేరుతో ఐసొలేషన్‌లో ఉన్న కొవిడ్‌ రోగులకు ఆపన్నహస్తం అందిస్తున్నది మదీనగూడకు చెందిన బిజ్జం భార్గవి.

నగర వ్యాప్తంగా సేవలు..

• యోగ గురువైన భార్గవి తనలాంటి మానవతాదృక్పథం కలిగి ఉన్న వారిని ఓ వేదికపైకి తెచ్చింది.
• మొత్తం 20 మంది సభ్యులతో కలిపి ఇన్‌స్టా గ్రాంలో కుక్‌(కలెక్టివ్‌ అపార్చునిటీ ఆఫ్‌ కైండ్‌నెస్‌)ను ఏర్పాటు చేసింది.
• వారు రోజూ వండుకునే దానికి అదనంగా వండుతూ తన స్నేహితులతో పాటు మరికొద్ది మందితో కలిసి కొవిడ్‌ రోగులకు బలవర్ధకమైన ఆహారం అందిస్తున్నది.
• అంతేకాక అవసరం ఉన్న వారికి మందులు, ఇతర నిత్యావసరాలనూ అందజేస్తున్నది.

వర్క్‌ ఫ్రం హోం ఉండటంతోనే..

మేం వర్క్‌ ఫ్రం హోంలో ఉండటంతోనే ఈ సేవ చేయగలుగుతున్నాం. కొవిడ్‌తో అనేక మంది సంక్షోభంలో చిక్కుకున్నారు. వారిని ఆదుకోవాలనే లక్ష్యంతో ఈ వేదిక ఏర్పాటు చేశాం. మేం వండుకునే దానికి అదనంగా ప్రతిరోజు వంట చేసి ఐసొలేషన్‌లో ఉన్న వారికి అందిస్తున్నాం.