Visit:
Operation Rolex | సిటీబ్యూరో, నవంబర్‌ 28 (నమస్తే తెలంగాణ): రోలెక్స్ వాచ్ దొరికింది. గత రెండురోజులుగా హైదరాబాద్‌ పోలీస్‌ కమిషనరేట్‌తో పాటు మొత్తం నగరంలో చర్చనీయాంశమైన ఆ ఖరీదైన గడియారం ఎట్టకేలకు పోలీసుల వద్దనే ఉన్నట్లు నిర్ధారణ జరిగింది. ‘నమస్తే తెలంగాణ’లో రెండురోజులుగా వచ్చిన కథనాలు పోలీసుశాఖను కుదిపేశాయి. రూ.25లక్షల విలువైన వాచ్‌ను నిందితుడి అరెస్ట్‌ సమయంలో కొట్టేసిన పోలీసుల తీరుపై ప్రతిచోటా విమర్శలు వ్యక్తమవుతున్నాయి.ఈ ఎపిసోడ్‌ను ఎలాగోలా ముగించేయాలని చూస్తున్న ఉన్నతాధికారులకు ఎక్కడ నుంచి మొదలుపెట్టి ఎక్కడ క్లోజ్‌ చేయాలంటూ తర్జనభర్జన పడుతున్నారని, తాము వాచ్ దొంగతనం జరిగిందని ప్రకటిస్తే ఇప్పుడున్న పరిస్థితుల్లో వరుస పరిణామాల మధ్య అది తమకు మచ్చ అంటూ వారు ఆవేదనవ్యక్తం చేశారు.
అయితే వాచ్ దొంగిలించింది ఎవరు. దీని వెనక ఎవరున్నారనే విషయాలను అధికారులు తెలిసినా నిగ్గు తేల్చలేకపో తున్నారు. ఆ వాచ్‌పై మక్కువ పడ్డ ముఖ్య అధికారికి తిరిగి ఇచ్చే క్రమంలో కొన్ని రోజులే మభ్యపెట్టి ఆ తర్వాత తిరిగి ఆయనకే ఇస్తారా అనే చర్చ కూడా మొదలైంది. లేక ఆయనకు భయపడి వెనక్కు తగ్గుతున్నారా.. లేక ఇప్పుడు వాచ్ దొరికిందని బయటపెడితే మళ్లీ ఎలాంటి సమస్య వచ్చిపడుతుందోనని మాట్లాడడం లేదా అంటూ పోలీసు వర్గాలే చర్చించుకుంటున్నాయి. శుక్రవారం జరిగిన క్రైమ్‌ రివ్యూ సమయంలో కూడా ఇద్దరు ముగ్గురు అధికారులు కలిసిన చోట ఇదే విషయాన్ని చర్చించుకున్నట్లు తెలిసింది. అసలు నిందితుడి ఇంటినుంచి ఖరీదైన వస్తువులు చోరీ చేయగలిగారంటే వీరి వెనక పెద్ద వ్యక్తి ఉండి ఉండాలని వారు అనుమానిస్తూ మాట్లాడుకున్నట్లు సమాచారం.
పోలీసులే ఇలాంటి పని చేశారంటూ మాట్లాడుకుంటుంటే చాలా సిగ్గుగా ఉందంటూ వారు అభిప్రాయం పంచుకున్నట్లు తెలిసింది. సీనియర్‌ అధికారుల మధ్యే ఈ చర్చ జరిగినట్లు తెలిసింది. అయితే ఇప్పటికీ వాచ్ ముచ్చటను రహస్యంగానే ఉంచుతూ దొరికిందని మాత్రం చెప్పి తప్పించుకుంటున్నారంటూ పోలీసు వర్గాల్లో చర్చ జరుగుతోంది. అసలు సూత్రధారి ఒకరైతే పాపం కానిస్టేబుల్‌ను ఇరికిస్తున్నారని, అసలు కానిస్టేబుల్‌ను తీయమని ప్రోత్సహించిందెవరు.. నాకు కావాలంటే నాకు కావాలని మాట్లాడుకున్నదెవరంటూ నిందితుడిని అరెస్ట్‌ చేయడానికి సంబంధించిన ఆపరేషన్‌తో సంబంధమున్న సిబ్బంది, అధికారులు మాట్లాడుకున్నారు.
రోలెక్స్ వాచ్‌పై ‘నమస్తే తెలంగాణ’లో వస్తున్న కథనాలు పోలీసుశాఖలో పెద్ద ఎత్తున సంచలనం సృష్టిస్తున్నాయి. వాచ్ దొరికిందని తాము ఆపరేషన్‌ సమయంలో దాన్ని పట్టించుకోలేదంటూ చెప్పుకుంటున్న పోలీసులు అసలు వాచ్ దొంగలెవరో బయటపెట్టడానికి పడుతున్న ఇబ్బందులపై ఆ శాఖలోనే పెద్ద ఎత్తున చర్చ జరుగుతోంది. నిందితుడిని పట్టుకునే సమయంలో ఓ కానిస్టేబుల్ రోలెక్స్ వాచ్‌ను తీసుకుని జేబులో వేసుకున్న దృశ్యాలు కెమెరాలో రికార్డయ్యాయని ప్రచారం చేస్తున్నప్పటికీ ఆ ఆపరేషన్‌కు సంబంధించిన వీడియోలు బయటపెట్టడం కానీ, కీలక అధికారికి ఈ వ్యవహారం తెలియకుండానే జరిగిందా అంటూ ప్రశ్నలు వేస్తున్నారు.
ప్రస్తుతం ఆ వాచ్ ఉన్నట్లుగా సీనియర్‌ అధికారులకు చెప్పినా అది ఎక్కడ పెట్టారనేది మాత్రం బయటపెట్టలేకపోతున్నారు. మరోవైపు సీజ్‌ చేసిన వస్తువుల్లో రోలెక్స్‌ను ఇప్పటివరకు ఎందుకు చూపించలేదంటూ అంతటా చర్చ జరుగుతోంది. మొత్తమ్మీద వాచ్ మాత్రం దొరికిందని, కానిస్టేబుల్ ఎందుకు తీశాడంటూ ప్రశ్నిస్తే పెద్ద సార్‌కు కావాలని తమసార్లు చెబితే తీసుకున్నానని చెప్పినట్లు సమాచారం. జేబులో వేసుకోమని చెప్పిందే మా సార్‌ అని వాళ్లు ఎలా చెబితే అలాగే చేయాలి కదా సార్‌ అంటూ విచారణ సందర్భంలో ఆ కానిస్టేబుల్ చెప్పినట్లు తెలిసింది. ఏ పెద్ద సార్‌ కోసం అని అడిగితే ఆ కానిస్టేబుల్ తమ సార్లకు తెలుసంటూ సమాధానం దాటేసినట్లు సమాచారం.
నిందితుడి ఇంట్లో అతన్ని అదుపులోకి తీసుకుని తనిఖీలు చేసిన సమయంలో వీడియో తీసినప్పుడు రికార్డయిన దృశ్యాలను పరిశీలించిన అధికారులు ఈ దోపిడీ వెనక ఉన్న సూత్రధారి కనిపెట్టినప్పటికీ బయటపెడితే శాఖ పరంగా పరువుపోతుందని భావిస్తున్నట్లు తెలిసింది. ఈ విషయంలో సీపీ సజ్జనార్‌ అధికారులపై ఫైరవడంతో పాటు ఇప్పటికైనా దీనికి ముగింపు పలకాలని, శాఖాపరంగా ఏదైనా చిన్న తేడా వచ్చినా అందరికీ శిక్ష తప్పదంటూ హెచ్చరించినట్లు తెలిసింది.
పెద్ద సార్‌కు ఇచ్చి మచ్చిక చేసుకుందామనుకున్న ఆ అధికారి ప్రస్తుతం తన సిబ్బందిని, ఆపరేషన్‌లో పాల్గొన్నవారిని గురువారం వరకు తిట్టి శుక్రవారం బతిలాడుకుంటున్నట్లు సమాచారం. పోలీసులే దొంగలుగా మారి శాఖకు మచ్చ తెచ్చిన ఈ వ్యవహారాన్ని ఇంకా సాగదీస్తూ ఎవరిమీదనో ఈ నేరం మోపి ఆ అధికారిని రక్షించే ప్రయత్నం చేస్తున్నారంటూ ఉన్నతాధికారుల తీరుపై పోలీసులు గుసగుసలాడుకుంటున్నారు. ఆపరేషన్‌ సమయంలో రోలెక్స్ కాకుండా మరిన్ని వస్తువుల విషయంలోనూ కీలక అధికారులకు అందించినట్లు తెలిసింది.
