Visit:
సిటీబ్యూరో, నవంబర్‌ 29(నమస్తే తెలంగాణ): హైదరాబాద్‌లో శాంతిభద్రతల పరిరక్షణే ధ్యేయంగా, ముఠా తగాదాలతో అశాంతి రేపుతున్న అసాంఘిక శక్తులపై నగర పోలీసు కమిషనర్‌ వీసీ సజ్జనార్‌ సీరియస్‌ అయ్యారు. శనివారం నగరంలోని పది ప్రధాన ముఠాలకు చెందిన సభ్యులను టీజీఐసీసీసీకి పిలిపించి అదనపు జిల్లా మెజిస్ట్రేట్‌ (ఎగ్జిక్యూటివ్‌) హోదాలో ప్రత్యేక కోర్టు నిర్వహించారు. కమిషనరేట్‌ పరిధిలోని సౌత్‌, సౌత్‌ఈస్ట్‌, సౌత్‌వెస్ట్‌ పరిధిల్లో ఆధిపత్య పోరు కోసం ఘర్షణ పడుతున్న వారిపై పోలీసులు ప్రత్యేక దృష్టి పెట్టారు.
హత్యలు, హత్యాయత్నాలకు పాల్పడుతూ ప్రత్యర్థి ముఠాలపై దాడులకు తెగబడుతున వారిని పోలీస్‌ కమిషనర్‌ విచారించారు. బీఎన్‌ఎస్‌ సెక్షన్‌ 126కింద 86 మందిని కమిషనర్‌ బైండోవర్‌ చేశారు. రాబోయే ఏడాది కాలం పాటు ఎలాంటి అసాంఘిక కార్యకలాపాలకు పాల్పడబోమని, సత్ప్రవర్తనతో ఉంటామని వారి చేత సెక్యూరిటీ బాండ్లు రాయించుకున్నారు. ఎవరైనా శాంతిభద్రతలకు విఘాతం కలిగిస్తే, ఉపేక్షించేది లేదని, వారిపై కఠినచర్యలు తీసుకుంటామని హెచ్చరించారు. నగరంలో ప్రశాంత వాతావరణం నెలకొల్పేందుకే ఈ నిర్ణయం తీసుకున్నామని సజ్జనార్‌ తెలిపారు. ఈ విచారణలో స్పెషల్‌ బ్రాంచ్‌ డీసీపీ కె.అపూర్వారావు, సంబంధిత ఇన్‌స్పెక్టర్లు పాల్గొన్నారు.
