న్యుమోనియా నుంచి కాపాడేందుకు వ్యాక్సిన్‌

సిటీబ్యూరో, ఆగస్టు 9 (నమస్తే తెలంగాణ): చిన్నారులను న్యుమోనియా నుంచి రక్షించే న్యుమోకొకల్‌ వ్యాక్సిన్‌ను ప్రభుత్వ వైద్యశాలల్లో ఉచితంగా ఇవ్వనున్నారు. హైదరాబాద్‌ జిల్లా పరిధిలో తొలుత ప్రారంభిస్తున్నట్లు జిల్లా వైద్య, ఆరోగ్య శాఖాధికారి డాక్టర్‌ జె. వెంకటి తెలిపారు. సోమవారం నిర్వహించిన టాస్క్‌ఫోర్స్‌ సమావేశంలో చిన్నపిల్లల ఆరోగ్య సంరక్షణకు సంబంధించిన పలు అంశాలపై సమీక్షించారు. ఈ సందర్భంగా డాక్టర్‌ వెంకటి మాట్లాడుతూ న్యుమోనియా నుంచి చిన్నారులను కాపాడేందుకు న్యుమోకొకల్‌ కాంజుగేట్‌ వ్యాక్సిన్‌ ఎంతగానో ఉపయోగపడుతుందని అన్నారు. దీంతో ఈ టీకాను సార్వత్రిక వ్యాధి నిరోధక టీకాల జాబితాలో చేర్చినట్లు తెలిపారు. ఈ వ్యాక్సిన్‌ను చిన్నారులకు 6 వారాల వయసులో మొదటి, 14 వారాల వయసులో రెండు, 9 నెలలప్పుడు మూడో డోసు వేయాల్సి ఉంటుందని అన్నారు. ప్రైవేట్‌లో ఈ టీకా ఖరీదు రూ.3 వేల వరకు ఉంటుందని తెలిపారు.