Ovarian cyst | మ‌హిళ క‌డుపులో నుంచి 10.6 కేజీల అండాశ‌య తిత్తి తొల‌గింపు

Medchal | కడుపు ఉబ్బ‌డం వంటి స‌మ‌స్య‌తో బాధ‌ప‌డుతున్న ఓ మ‌హిళ క‌డుపులో నుంచి 10.6 కేజీల అండాశ‌య తిత్తిని మ‌ల్లారెడ్డి ఇన్‌స్టిట్యూట్ ఆఫ్ మెడిక‌ల్ సైన్సెస్( MRIMS ) స‌ర్జ‌న్లు తొల‌గించారు. ప్ర‌స్తుతం బాధిత మ‌హిళ ఆరోగ్య ప‌రిస్థితి నిల‌క‌డ‌గా ఉంద‌ని వైద్యులు తెలిపారు.

Ovarian cyst | కడుపు ఉబ్బ‌డం వంటి స‌మ‌స్య‌తో బాధ‌ప‌డుతున్న ఓ మ‌హిళ క‌డుపులో నుంచి 10.6 కేజీల అండాశ‌య తిత్తి( ovarian cyst )ని మ‌ల్లారెడ్డి ఇన్‌స్టిట్యూట్ ఆఫ్ మెడిక‌ల్ సైన్సెస్( MRIMS ) స‌ర్జ‌న్లు తొల‌గించారు. ప్ర‌స్తుతం బాధిత మ‌హిళ ఆరోగ్య ప‌రిస్థితి నిల‌క‌డ‌గా ఉంద‌ని వైద్యులు తెలిపారు.

వివ‌రాల్లోకి వెళ్తే.. మేడ్చ‌ల్‌కు చెందిన మ‌ల్ల‌మ్మ‌(62)కు గ‌త ఏడాది కాలం నుంచి క‌డుపు ఉబ్బుతుంది. కానీ ఆమెకు ఎలాంటి నొప్పి లేదు. దీంతో ఆమె మ‌ల్లారెడ్డి ఇన్‌స్టిట్యూట్ ఆఫ్ మెడిక‌ల్ సైన్సెస్ స‌ర్జ‌న్ల‌ను సంప్ర‌దించింది. మ‌ల్ల‌మ్మ‌కు స‌ర్జ‌న్లు ప‌రీక్ష‌లు నిర్వ‌హించ‌గా, అండాశ‌యంపై అండాశ‌యం తిత్తి ఏర్ప‌డిన‌ట్లు గుర్తించారు. ఆ తిత్తి కార‌ణంగా క‌డుపు ఉబ్బ‌డం జ‌రిగింద‌ని నిర్ధారించిన వైద్యులు.. శ‌స్త్ర చికిత్స ద్వారా దాన్ని తొల‌గించారు. ఆ తిత్తి బ‌రువు 10.6 కేజీలుగా ఉంద‌ని స‌ర్జ‌న్లు స్ప‌ష్టం చేశారు.

నిల‌క‌డ‌గా మ‌ల్ల‌మ్మ ఆరోగ్యం

మ‌ల్ల‌మ్మ ఆరోగ్యం నిల‌క‌డ‌గా ఉంద‌ని జ‌న‌ర‌ల్ స‌ర్జ‌న్ డాక్ట‌ర్ రామ్మోహ‌న్ రావు స్ప‌ష్టం చేశారు. విజ‌య‌వంతంగా తిత్తిని తొల‌గించామ‌న్నారు. 25 ఏండ్ల క్రితం ఆమె గ‌ర్భాశ‌యాన్ని తొల‌గించుకున్నార‌ని తెలిపారు. అయితే హార్మోన్లు స‌మ‌తుల్యంగా లేని కార‌ణంగా అండాశ‌య తిత్తులు ఏర్ప‌డుతాయ‌న్నారు. ఈ తిత్తిలో ద్ర‌వ‌ప‌దార్థం నిండి ఉంటుంద‌ని చెప్పారు. పెల్విక్ ఇన్‌ఫెక్ష‌న్ల కార‌ణంగా కూడా ఈ స‌మ‌స్య ఏర్ప‌డే అవ‌కాశం ఉంద‌న్నారు. అండాశ‌య తిత్తుల‌ను ప్రాథ‌మిక ద‌శ‌లోనే గుర్తించి, చికిత్స చేయించుకుంటే మంచిద‌ని సూచించారు.