ఆత్మ‌హ‌త్యాయ‌త్నం.. యువ‌కుడి ప్రాణాలు కాపాడిన కీస‌ర పోలీసులు

Keesara Police | కుటుంబ స‌మ‌స్య‌ల కార‌ణంగా ఆత్మ‌హ‌త్య‌కు య‌త్నించిన ఓ యువ‌కుడి ప్రాణాల‌ను కీస‌ర పోలీసులు కాపాడారు. వివ‌రాల్లోకి వెళ్తే.. కీస‌రకు చెందిన 30 ఏండ్ల యువ‌కుడు భ‌వ‌న నిర్మాణ రంగంలో ప‌ని చేస్తూ జీవ‌నం

హైద‌రాబాద్ : కుటుంబ స‌మ‌స్య‌ల కార‌ణంగా ఆత్మ‌హ‌త్య‌కు య‌త్నించిన ఓ యువ‌కుడి ప్రాణాల‌ను కీస‌ర పోలీసులు కాపాడారు. వివ‌రాల్లోకి వెళ్తే.. కీస‌రకు చెందిన 30 ఏండ్ల యువ‌కుడు భ‌వ‌న నిర్మాణ రంగంలో ప‌ని చేస్తూ జీవ‌నం కొన‌సాగిస్తున్నాడు. కుటుంబ స‌మ‌స్య‌ల‌తో స‌త‌మ‌త‌మ‌వుతున్న ఆ యువ‌కుడు ఆత్మ‌హత్య చేసుకోవాల‌ని నిర్ణ‌యించుకున్నాడు. ఈ క్ర‌మంలో బుధ‌వారం రాత్రి 10:30 గంట‌ల స‌మ‌యంలో ఇంట్లోనే ఉరేసుకునేందుకు య‌త్నించాడు.

ఈ విష‌యాన్ని ప‌సిగ‌ట్టిన కుటుంబ స‌భ్యులు 100 డ‌య‌ల్ చేయ‌డంతో క్ష‌ణాల్లోనే పెట్రోల్ మొబైల్ వెహిక‌ల్, బ్లూ కోట్ సిబ్బంది రాములు, మ‌హేంద‌ర్, శానూర్ బాబుమ్‌, సురేంద‌ర్ ఘ‌ట‌నాస్థ‌లికి చేరుకున్నారు. యువ‌కుడు ఉన్న గ‌దిలోకి ప్ర‌వేశించి.. ఉరేసుకునేందుకు య‌త్నిస్తుండ‌గా ఆపారు. అత‌ని ప్రాణాలు కాపాడారు. ఆ త‌ర్వాత కుటుంబ స‌భ్యుల సమ‌క్షంలో కౌన్సెలింగ్ నిర్వ‌హించారు. క్ష‌ణాల్లో స్పందించి యువ‌కుడి ప్రాణాలు కాపాడిన పోలీసు సిబ్బందిపై రాచ‌కొండ పోలీసు క‌మిష‌న‌ర్ మ‌హేశ్ భ‌గ‌వ‌త్ ప్ర‌శంస‌లు కురిపించారు.