Visit:
కేబీఆర్‌ పార్‌ పరిసర ప్రాంతాల్లో ట్రాఫిక్‌ చికులకు శాశ్వత పరిష్కారం చేపట్టిన ఏడు స్టీల్‌ ఫ్లై ఓవర్‌ , అండర్‌ పాస్‌ ల నిర్మాణ డిజైన్లను ప్రభుత్వం ఎట్టకేలకు సవరించింది. పాత ప్రతిపాదనలను రద్దు చేస్తూ ప్యాకేజీ-1, ప్యాకేజీ-2 కింద పనుల పరిధిని మారుస్తూ పురపాలక, పట్టణాభివృద్ధి శాఖ ప్రిన్సిపల్‌ కార్యదర్శి జయేష్‌ రంజన్‌ మంగళవారం జీవో ఎంఎస్‌ నం. 927 జారీ చేశారు. జూబ్లీహిల్స్‌ చెక్‌ పోస్ట్‌ జంక్షన్‌ నుంచి ముఫకం జా కాలేజీ వరకు బంజారాహిల్స్‌ రోడ్‌ నంబర్‌ 1ని అనుసంధానించేలా నూతన స్టీల్‌ ఫె్లైఓవర్‌ను ప్రాజెక్టు కాంట్రాక్టర్‌ సంస్థ మేఘా ఇంజినీరింగ్‌ అండ్‌ ఇన్‌ ఫ్రాస్ట్రక్చర్స్‌ లిమిటెడ్‌( మేఘా)కు కేటాయించారు. కాగా ఎన్‌ఎఫ్‌సీఎల్‌ జంక్షన్‌ నుంచి బంజారాహిల్స్‌ వరకు, టీవీ9 జంక్షన్‌ – ఎన్‌ఎఫ్‌సీఎల్‌ వద్ద ప్రతిపాదించిన అండర్‌ పాస్‌, ఫె్లైఓవర్‌ పనులను రద్దు చేశారు. కేఎన్‌ఆర్‌ కన్‌స్ట్రక్షన్స్‌ లిమిటెడ్‌కు గతంలో ఇచ్చిన లెటర్‌ ఆఫ్‌ యాక్సెప్టెన్స్‌ (ఎల్‌ఓఏ)ను రద్దు చేసి, వారు డిపాజిట్‌ చేసిన మొత్తాన్ని తిరిగి చెల్లించేందుకు ఆమోదం తెలిపారు.
ప్యాకేజీ-1లో భాగంగా జూబ్లీహిల్స్‌ చెక్‌ పోస్ట్‌, కేబీఆర్‌ పార్‌ ఎంట్రన్స్‌, ముగ్ధ జంక్షన్‌ వద్ద ప్రతిపాదిత పనులకు సవరించిన ఐబీఎమ్‌ (ఐబీఎం) అంచనా వ్యయాన్ని రూ. 365.85 కోట్లుగా (గతంలో కంటే 13.56శాతం అధిగం) నిర్ధారించారు. దీని మొత్తం మంజూరైన వ్యయం రూ. 580 కోట్లుగా ఉంది. ప్యాకేజీ-2లో రోడ్‌ నం. 45, ఫిలింనగర్‌, అగ్రసేన్‌ జంక్షన్‌, క్యాన్సర్‌ ఆస్పత్రి ప్రాజెక్టు పరిధిని సవరించి.. ముగ్ధ జంక్షన్‌ నుంచి ముఫకం జా కాలేజీ, బంజారాహిల్స్‌ రోడ్‌ నంబర్‌ 1 వరకు నిర్మించేలా ప్లాన్‌ మార్చారు. సవరించిన ఐబీఎమ్‌ అంచనా వ్యయం రూ. 349.31 కోట్లు కాగా (గతంలో కంటే 28శాతం అధిగం), దీని మొత్తం మంజూరైన ప్రాజెక్టు వ్యయం రూ. 510 కోట్లుగా ఖరారు చేశారు.
ఈ ప్యాకేజీ-1, ప్యాకేజీ-2 సవరించిన ప్రతిపాదనలను పరిశీలన కోసం ఈపీసీ కమిటీ-3 ముందుంచాలని అధికారులను ప్రభుత్వం ఆదేశించింది. ప్యాకేజీ-1, ప్యాకేజీ-2 పనుల పర్యవేక్షణ కోసం ప్రాజెక్టు మేనేజ్‌ మెంట్‌ కన్సల్టెంట్స్‌ (పీఎంసీ) సేవలను యథావిధిగా కొనసాగించనున్నారు. ఈ మేరకు జీహెచ్‌ఎంసీ కమిషనర్‌ సమర్పించిన నివేదికను పరిశీలించిన అనంతరం ప్రభుత్వం డిజైన్ల మార్పునకు, నూతన ఉత్తర్వులకు ఆమోదం తెలిపినట్లు ఉత్తర్వులో పేర్కొన్నారు.
