గ్యాస్‌ సిలిండర్ల బ్లాక్‌ దందా!

గ్రేటర్‌ పరిధిలో గ్యాస్‌ సిలిండర్ల బ్లాక్‌ దందా మూడు పువ్వులు ఆరు కాయలుగా సాగుతున్నది.

• గ్రేటర్‌ పరిధిలో యథేచ్ఛగా విక్రయాలు
• ఏజెన్సీల నుంచి నేరుగా వ్యాపారులకు సరఫరా!
• ఒక్కో సిలిండర్‌ రూ.2,500కు విక్రయం

సిటీబ్యూరో, నవంబర్‌ 13 (నమస్తే తెలంగాణ) :గ్రేటర్‌ పరిధిలో గ్యాస్‌ సిలిండర్ల బ్లాక్‌ దందా మూడు పువ్వులు ఆరు కాయలుగా సాగుతున్నది. వంట గ్యాస్‌ ఏజెన్సీలు వినియోగదారులకు అందించాల్సిన డొమెస్టిక్‌ గ్యాస్‌ సిలిండర్లను బ్లాక్‌ మార్కెట్‌కు యథేచ్ఛగా సరఫరా చేస్తున్నాయి. 14కేజీల డొమెస్టిక్‌ వంట గ్యాస్‌ ప్రభుత్వ ధర రూ.990గా ఉంది. దీన్ని వ్యాపారులు బ్లాక్‌లో రూ.2,500పైగా అమ్ముతున్నారు. గ్యాస్‌ ఏజెన్సీలు బహిరంగంగానే సరఫరా చేస్తున్నట్లు వ్యాపారులే స్వయంగా చెప్తున్నారు. ఈ దందా బహిరంగంగా కొనసాగుతున్నా పౌర సరఫరాల అధికారులు మాత్రం అటువైపు కన్నెత్తి చూడటం లేదు.

నిత్యం వేలాది సిలిండర్లు బ్లాక్‌ మార్కెట్‌కు చేరుతున్నా ఎక్కడా తనిఖీలు చేసిన దాఖలాలు కనిపించడం లేదు. దీంతో ఏజెన్సీలో గ్యాస్‌ కనెక్షన్లు కలిగి ఉన్న అసలైన వినియోగదారులకు అందాల్సిన సిలిండర్లు పక్కదారి పడుతున్నాయి. ఈ వ్యవహారంలో పౌర సరఫరాల అధికారుల హస్తం ఉన్నందు వల్లనే తనిఖీలు చేపట్టకుండా మౌనంగా ఉంటున్నారనే ఆరోపణలు వస్తున్నాయి. ఒక్కో ఏజెన్సీ నుంచి పౌరసరఫరాల అధికారులకు ప్రతినెలా రూ.లక్షల్లో మామూళ్లు వెళ్తున్నాయనే చర్చ జరుగుతున్నది.

గ్రేటర్‌ వ్యాప్తంగా జోరుగా దందా..

గ్యాస్‌ సిలిండర్ల అక్రమ దందా గ్రేటర్‌ పరిధిలోని హైదరాబాద్‌, మేడ్చల్‌ మల్కాజిగిరి, రంగారెడ్డి జిల్లాల్లో జోరుగా సాగుతున్నది. ఏజెన్సీలు కనెక్షన్‌ ఉన్న వినియోగదారులకు సరఫరా చేసే వాహనాల్లోనే వ్యాపారులకు కూడా సరఫరా చేస్తున్నారు. రూ.990 డొమెస్టిక్‌ సిలిండర్‌ను వ్యాపారులకు రూ.1,500 నుంచి రూ.2,000 ధర ఫిక్స్‌ చేసి సరఫరా చేస్తున్నారు. అనంతరం వ్యాపారులు ఒక్కో డొమెస్టిక్‌ సిలిండర్‌ను రూ.2,400 నుంచి రూ.2,500 ఆపై ధరకు పెంచి అమ్ముతున్నారు.

ఈ దందాకు సిటీలోని అన్ని ఏజెన్సీలు సహకరిస్తున్నట్లు తెలుస్తున్నది. గ్యాస్‌ సిలిండర్లు అక్రమంగా విక్రయిస్తుండటంతో వినియోగదారులకు సరైన సమయంలో గ్యాస్‌ సిలిండర్‌ ఇంటికి చేరడం లేదు. బుక్‌ చేసుకున్నవారికి చేరాల్సిన గ్యాస్‌ సిలిండర్‌ను సంబంధిత చిరునామాకు చేరవేయకుండానే వినియోగదారుడు అందుబాటులో లేరనే మెసేజ్‌లు పంపిస్తున్నారు. దాన్ని బ్లాక్‌ వ్యాపారులకు మళ్లిస్తున్నట్లు తెలుస్తున్నది. అదేవిధంగా మరికొన్ని ప్రాంతాల్లో బుక్‌ చేసుకుని 10 రోజులు దాటినా వినియోగదారులకు గ్యాస్‌బండ చేరడంలేదు. ఇలా మెజార్టీ వినియోగదారులకు గ్యాస్‌ డెలివరీలో లేట్‌ చేయడం ద్వారా మిగిలిన సిలిండర్లను బ్లాక్‌ మార్కెట్‌కు తరలిస్తున్నారు.

శివారులో రెట్టింపు ధరకు అమ్మకాలు

గ్యాస్‌ సిలిండర్ల బ్లాక్‌ దందా గ్రేటర్‌ శివారు ప్రాంతాల్లో యథేచ్ఛగా సాగుతున్నది. ఆయా ప్రాంతాలకు సరఫరా చేసే ఏజెన్సీలు బ్లాక్‌ దందాతో ప్రతినెలా రూ.లక్షల్లో ఆర్జిస్తున్నట్లు తెలుస్తున్నది. శివారు ప్రాంతాల్లో నిర్మాణాలు జరుగుతుండటం వల్ల భవన నిర్మాణ కార్మికులు, చిరుద్యోగులు ఎక్కువగా ఉంటారు. వాళ్లంతా వలసదారులు కావడంతో సిటీలో గ్యాస్‌ కనెక్షన్‌ ఉండటం లేదు. అదేవిధంగా ఇటీవల పశ్చిమాసియా ఉద్రిక్తతల నేపథ్యంలో గ్యాస్‌ కొరత ఏర్పడటంతో కొత్త కనెక్షన్లు ఇవ్వడం లేదు. దీన్ని ఆసరాగా చేసుకుని ఏజెన్సీలు, వ్యాపారులు కుమ్మక్కై గ్యాస్‌ బ్లాక్‌ దందాకు తెరతీశారు.

ఆయా ప్రాంతాల్లో కార్మికులు, ప్రైవేట్‌ ఉద్యోగులకు రెట్టింపు ధరకు విక్రయిస్తూ సొమ్ము చేసుకుంటున్నారు. అటు పౌర సరఫరాల అధికారులకు కూడా నెలనెలా మామూళ్లు వెళ్తుండటంతో నిమ్మకునీరెత్తినట్లు వ్యవహరిస్తున్నారనే ఆరోపణలు వస్తున్నాయి. ఏండ్ల తరబడిగా ఈ దందా సాగుతున్నా హైదరాబాద్‌, రంగారెడ్డి, మేడ్చల్‌ జిల్లా సివిల్‌ సైప్లెస్‌ అధికారులు ఎక్కడా తనిఖీలు చేసిన దాఖలాలు కనిపించడం లేదు. ఇప్పటికైనా బ్లాక్‌ దందాకు చెక్‌ పెట్టేలా పౌర సరఫరాల ఉన్నతాధికారులు దృష్టి సారించాలని నగర ప్రజలు కోరుతున్నారు. యథేచ్ఛగా పెంచుతున్న ధరలను కట్టడి చేస్తూ బ్లాక్‌ దందాను నిర్మూలించాలని డిమాండ్‌ చేస్తున్నారు.