బల్దియా బడ్జెట్‌ రూ. 6,841.87 కోట్లు

• ఆమోదం తెలిపిన కౌన్సిల్‌
• జీహెచ్‌ఎంసీ, ప్రభుత్వ బడ్జెట్‌ ప్రతిపాదనలపై విస్తృత చర్చ
• సూచనలు స్వీకరణ.. అనంతరం ఆమోదం

సిటీబ్యూరో, జూన్‌ 29 (నమస్తే తెలంగాణ ) : గ్రేటర్‌ హైదరాబాద్‌ మున్సిపల్‌ కార్పొరేషన్‌ 2021-22 వార్షిక బడ్జెట్‌ రూ.6,841.87కోట్లుగా నిర్ధారించగా.. మంగళవారం వర్చువల్‌గా జరిగిన జీహెచ్‌ఎంసీ సర్వసభ్య సమావేశంలో ఏకగ్రీవంగా ఆమోదించారు. ఈ బడ్జెట్‌ను నగర మేయర్‌ గద్వాల్‌ విజయలక్ష్మి ప్రవేశపెట్టగా, బడ్జెట్‌లోని వివరాలను జీహెచ్‌ఎంసీ కమిషనర్‌ లోకేశ్‌కుమార్‌ సమావేశంలో వివరించారు. ఈ బడ్జెట్‌పై విస్తృతంగా జరిగిన చర్చలో సభ్యులు లేవనెత్తిన ప్రశ్నలకు లోకేశ్‌కుమార్‌, ఫైనాన్స్‌ విభాగం అడిషనల్‌ కమిషనర్‌ జయరాజ్‌ కెనేడి సమాధానాలు ఇచ్చారు. ఈ చర్చలో సభ్యులు పలు సూచనలు చేశారు. అనంతరం బడ్జెట్‌ను ఆమోదిస్తున్నట్లు మేయర్‌ ప్రకటించారు.

బడ్జెట్‌ వివరాలు

• జీహెచ్‌ఎంసీ బడ్జెట్‌ రూ.5600కోట్లు కాగా, ప్రభుత్వానికి సంబంధించి డబుల్‌ బెడ్‌ రూం ఇండ్ల పథకానికి వేరుగా రూ.1241.87కోట్లు కేటాయించారు. బడ్జెట్‌లో రెవెన్యూ వ్యయం రూ. 2,414 కోట్లు కాగా క్యాపిటల్‌ వ్యయం రూ. 3,186 కోట్లు , ఇక హౌజింగ్‌ కార్పొరేషన్‌ నుంచి వచ్చే బడ్జెట్‌ రూ.1241.87 కోట్లుగా నిర్ణయించారు.
• రెవెన్యూ ఆదాయం రూ. 3571 కోట్లు కాగా మూలధనం ఆదాయం రూ.983.04 కోట్లు
• ఇక రెవెన్యూ ఆదాయాన్ని పరిశీలిస్తే అధిక ఆస్తిపన్ను రూపంలో రూ.1850కోట్లు(32శాతం) లభిస్తుంది.
• 15వ ఫైనాన్స్‌ కమీషన్‌ కింద రూ. 355 కోట్లు
• 2021-22 సంవత్సరానికిగాను ప్రభుత్వం ద్వారా నిధులు వస్తాయని అంచనా వేసింది. కౌన్సిల్‌ ఆమోదించిన 2021-22 వార్షిక బడ్జెట్‌ రూ. 6,841.87కోట్లు ప్రతిపాదనలు ప్రభుత్వానికి సమర్పించనున్నారు.