Elevated Corridors | ఎలివేటెడ్‌ కారిడార్లు ఉన్నట్టా.. లేనట్టా

ప్యారడైజ్‌ నుంచి దుండిగల్‌ వరకు, ప్యాట్నీ నుంచి తూంకుంట వరకు రెండు భారీ ఎలివేటెడ్‌ కారిడార్లను నిర్మాణం చేస్తామని ప్రకటించి శంకుస్థాపన చేసిన ప్రభుత్వం బడ్జెట్‌లో మాత్రం నామమాత్రపు నిధులిచ్చి వాటి భవితవ్యాన్ని సందిగ్ధంలో పడేసింది.

• ప్యారడైజ్‌-దుండిగల్‌.. ప్యాట్నీ- తూంకుంట
• ఫ్లైఓవర్లను ప్రస్తావించని సర్కారు

Elevated Corridors | సిటీబ్యూరో, జులై 25 (నమస్తే తెలంగాణ) : ప్యారడైజ్‌ నుంచి దుండిగల్‌ వరకు, ప్యాట్నీ నుంచి తూంకుంట వరకు రెండు భారీ ఎలివేటెడ్‌ కారిడార్లను నిర్మాణం చేస్తామని ప్రకటించి శంకుస్థాపన చేసిన ప్రభుత్వం బడ్జెట్‌లో మాత్రం నామమాత్రపు నిధులిచ్చి వాటి భవితవ్యాన్ని సందిగ్ధంలో పడేసింది. ఈ రెండు కారిడార్ల నిర్మాణానికి అవుతున్న వ్యయం 3800 కోట్లు. కాగా ప్రభుత్వం సరిగ్గా పార్లమెంటు ఎన్నికల ముందు హడావుడిగా ఆల్వాల్‌ టిమ్స్‌ వద్ద భారీ సభను ఏర్పాటు చేసి శంకుస్థాపన చేశారు. కానీ బడ్జెట్‌లో మాత్రం వాటి ప్రస్తావన లేకుండా చేశారు.

ఇచ్చిన 700 కోట్లలో…

హైదరాబాద్‌ పరిధిని విస్తరిస్తామంటూ నగరంలో ఆధునాతన సదుపాయాలు, మౌలిక వసతుల నిర్వహణ విభాగమైన హెచ్‌ఎండీఏ ఈ ఏడాదికి గాను 1600 కోట్లు కావాలంటూ బడ్జెట్‌ ప్రతిపాదనలు పంపింది. కానీ ప్రభుత్వం 700 కోట్లే కేటాయించింది. ఇందులో 200 కోట్లు ఔటర్‌ రింగు రోడ్డు రుణాల చెల్లింపుకే సరిపోనున్నాయి. ఇక మిగిలిన 500 కోట్లను వేటికి ఖర్చు చేయాలో స్పష్టత లేదు. హైదరాబాద్‌ను విశ్వనగరంలో తీర్చిదిద్దే క్రమంలో లింక్‌ రోడ్లు, స్పైక్‌ రోడ్లతోపాటుగా హైదరాబాద్‌ అభివృద్ధికి అవసరమైన ఎన్నో ప్రతిష్టాత్మకమైన ప్రాజెక్టులను హెచ్‌ఎండీఏ చేపట్టింది.

ఈ క్రమంలో ప్యారడైజ్‌, ప్యాట్నీల వద్ద 2 భారీ ఎలివేటెడ్‌ కారిడార్లు నిర్మించతలపెట్టింది. వీటికి 3800 కోట్లు కానుంది. శంకుస్థాపన చేశారు కానీ ఇప్పటికీ పరిహారం రక్షణ శాఖకు కేటాయించాల్సిన భూముల ఎంపిక కూడా పూర్తి కాలేదు. భూ బదలాయింపులు జరిగితే గానీ, ప్రాజెక్టు నిర్మాణానికి అనుమతులు ఇచ్చే పరిస్థితులు ఉంటాయి. అదే గనుక జరిగితే… భూ బదలాయింపులతో జరిగే జాప్యం ఆ 2 ప్రాజెక్టులు ఆలస్యమయ్యే అవకాశం ఉంది.