మూడేండ్ల బాలుడి పైనుంచి దూసుకెళ్లిన కారు

మూడేండ్ల బాలుడి పైనుంచి ఓ కారు రెండు చక్రాలు దూసుకువెళ్లడంతో దవాఖానలో ప్రాణాపాయ స్థితిలో కొట్టుమిట్టాడుతున్న సంఘటన దుండిగల్‌ పోలీస్‌ స్టేషన్‌ పరిధిలో చోటుచేసుకున్నది. ఈ వీడియో వైరల్‌గా మారడంతో విషయం ఆలస్యంగా వెలుగులోకి వచ్చింది. వివరాల్లోకి వెలితే... బౌరంపేటలోని ల్యాండ్‌మార్క్‌ -2 గేటెడ్‌ కమ్యూనిటీ కాలనీలో

• బౌరంపేటలో ఘటన

దుండిగల్‌, సెప్టెంబర్‌ 1 : మూడేండ్ల బాలుడి పైనుంచి ఓ కారు రెండు చక్రాలు దూసుకువెళ్లడంతో దవాఖానలో ప్రాణాపాయ స్థితిలో కొట్టుమిట్టాడుతున్న సంఘటన దుండిగల్‌ పోలీస్‌ స్టేషన్‌ పరిధిలో చోటుచేసుకున్నది. ఈ వీడియో వైరల్‌గా మారడంతో విషయం ఆలస్యంగా వెలుగులోకి వచ్చింది. వివరాల్లోకి వెలితే… బౌరంపేటలోని ల్యాండ్‌మార్క్‌ -2 గేటెడ్‌ కమ్యూనిటీ కాలనీలో మంగళవారం ఉదయం ఓ వ్యక్తి తనకారును నీటితో శుభ్రం చేసుకున్న అనంతరం కారులోకి ఎక్కి స్టార్ట్‌ చేశాడు. ఇంతలో ఓ మూడేండ్ల బాలుడు కారుపక్కనుంచి నడుచుకుంటూ వచ్చి కారుముందు నిల్చున్నాడు.

బాలుడు ఎత్తు తక్కువగా ఉండటంతో కారు నడిపే వ్యక్తికి కన్పించకపోవడంతో కారును ముందుకు పోనిచ్చాడు. దీంతో కారు ముందు నిలుచున్న బాలుడు ముందుగా కారు ఎడమవైపు ముందు చక్రాల కింద పడిపోయాడు. వెనుక చక్రాలు సైతం బాలుడిపై నుంచి వెళ్లాయి. కొద్ది క్షణాల్లో బాలుడి తల్లి బయటకు వచ్చి నేలపై పడిపోయిన బాలుడిని అక్కున చేర్చుకొని అక్కడి నుంచి ఇంట్లోకి తీసుకువెళ్లింది. ఇదంతా రెండే నిమిషాల్లో జరిగింది. కుటుంబసభ్యులు వెంటనే బాలుడిని బాచుపల్లిలోని ఓ వైద్యశాలకు తీసుకువెళ్లగా చికిత్స పొందుతున్నాడని వైద్యులు తెలిపారు. ఈ విషయమై పోలీసులకు ఫిర్యాదు అందలేదు.