GHMC | జీహెచ్‌ఎంసీ వార్డుల విభజనపై బీఆర్‌ఎస్‌ ఎమ్మెల్యేల ఆగ్రహం.. కమిషనర్‌కు వినతిపత్రం

GHMC | జీహెచ్‌ఎంసీ వార్డుల విభజన అశాస్త్రీయంగా జరిగిందని బీఆర్‌ఎస్‌ ఎమ్మెల్యేలు ఆరోపించారు. వార్డుల విభజనను పునఃపరిశీలించాలని విజ్ఞప్తి చేశారు. ఈ మేరకు జీహెచ్‌ఎంసీ కమిషనర్‌ను కలిసి వినతిపత్రం అందజేశారు.

GHMC | జీహెచ్‌ఎంసీ వార్డుల విభజన అశాస్త్రీయంగా జరిగిందని బీఆర్‌ఎస్‌ ఎమ్మెల్యేలు ఆరోపించారు. వార్డుల విభజనను పునఃపరిశీలించాలని విజ్ఞప్తి చేశారు. ఈ మేరకు జీహెచ్‌ఎంసీ కమిషనర్‌ను కలిసి వినతిపత్రం అందజేశారు. ఈ సందర్భంగా ఎమ్మెల్సీ దాసోజు శ్రవణ్‌ మాట్లాడుతూ.. ప్రజాపాలన అంటూ సొల్లుమాటలు చెబుతున్నారని మండిపడ్డారు. ఇష్టానుసారంగా వార్డులను పెంచారని అన్నారు.

జీహెచ్‌ఎంసీలో కాంగ్రెస్‌కు పట్టులేకపోవడంతో బీఆర్‌ఎస్‌ను దెబ్బకొట్టాలనే ప్రయత్నం చేస్తుందని దాసోజు శ్రవన్‌ విమర్శించారు. రాజ్యాంగబద్ధంగా వెళ్లకపోతే జీహెచ్ఎంసీ వార్డుల విభజనపై కోర్టుకెళ్తామని హెచ్చరించారు. రూల్స్‌కు అనుకూలంగా విభజన ఉండాలని.. తమ అభిప్రాయాలను తీసుకోవాలని సూచించారు.

ప్రజలతో మాట్లాడకుండా ఇష్టానుసారంగా వార్డులను ఏర్పాటు చేశారని సనత్‌నగర్‌ ఎమ్మెల్యే, మాజీ మంత్రి తలసాని శ్రీనివాస్‌ యాదవ్‌ విమర్శించారు. ఆఫీసులో కూర్చొని 300 డివిజన్లు చేశారని మండిపడ్డారు. ప్రభుత్వానికి ఎందుకంత తొందరపాటు అని ప్రశ్నించారు. ఈ వార్డుల విభజనపై రేపు కౌన్సిల్‌ సమావేశంలో మాట్లాడతామని స్పష్టం చేశారు. ఇప్పుడున్న 150 డివిజన్లకే అధికారులు లేరని గుర్తుచేశారు. ఫ్లెక్సీల విషయంలో కూడా కాంగ్రెస్‌ నేతలు రాజకీయం చేస్తున్నారని ఆగ్రహం వ్యక్తం చేశారు.

గతంలో మేడ్చల్‌ మొత్తం రూరల్‌గా ఉండేదని మాజీ మంత్రి చామకూర మల్లారెడ్డి తెలిపారు. అనేక మంది ఉన్న పాలనను 16 మందికి కుదించారని ఆవేదన వ్యక్తం చేశారు. గతంలో 7 మున్సిపాలిటీలు, 3 కార్పొరేషన్లు ఉంటే కేవలం 16 కార్పొరేటర్లను చేశారని తెలిపారు. బంజారాహిల్స్‌లాగా కీసర ఎలా ఉంటుందని ఆయన ప్రశ్నించారు.