ఉక్క‌పోత‌కు గుర‌వుతున్నారా..? అయితే ఈ ప్రాంతాల‌కు వెళ్దాం ప‌దండీ..

ఎండ‌లు మండిపోతున్నాయి.. అత్య‌ధిక ఉష్ణోగ్ర‌త‌లు న‌మోదు అవుతున్నాయి. దీంతో ఎండ వేడిమికి త‌ట్టుకోలేక ఉక్క‌పోత‌కు గుర‌వుతున్నారు. వేడి గాలుల‌కు హైద‌రాబాదీలు తీవ్ర ఇబ్బందులు ప‌డుతున్నారు. ఉక్క‌పోత నుంచి ఉప‌శ‌మ‌నం పొందేందుకు గ్రీన్ మ్యాట్‌లు, కూల‌ర్లు, ఏసీలు వినియోగించిన‌ప్ప‌టికీ లాభం లేకుండా పోతోంది. చ‌ల్ల‌ని ప్రాంతాల‌కు వెళ్తే బాగుండు అనే ఫీలింగ్ క‌లుగుతోంది. ఉక్క‌పోత నుంచి ఉప‌శ‌మనం పొందేందుకు సుదూర ప్రాంతాల‌కు వెళ్లాల్సిన అవ‌స‌రం లేదు.. హైద‌రాబాద్ చుట్టు ప‌క్క‌లా చ‌ల్ల‌ని ప్రదేశాలున్నాయి.. అవేంటో ఓసారి లుక్కేద్దాం మ‌రి..

గండీపేట్ లేక్

హైద‌రాబాద్ శివారు ప్రాంతాల్లో గండీపేట్ లేక్ ఉంది. దీన్ని ఉస్మాన్ సాగ‌ర్ అని కూడా పిలుస్తారు. హైద‌రాబాదీల‌కు ఇది ఒక మంచి పిక్నిక్ స్పాట్. ఇక్క‌డ చ‌ల్ల‌ని వాతావ‌ర‌ణం ఉండ‌టంతో ఆహ్లాద‌క‌రంగా గ‌డ‌పొచ్చు. ఇక ఫోటో షూట్‌కు ఈ ప్రాంతం ఫేమ‌స్.

శామీర్‌పేట్ లేక్

శామీర్‌పేట్ లేక్ కూడా మంచి పిక్నిక్ స్పాట్. ఉద‌యం, సాయంత్రం వేళ‌ల్లో ఆహ్లాద‌క‌ర వాతావ‌ర‌ణం ఉంటుంది. స్వ‌చ్ఛ‌మైన గాలిని పొందొచ్చు. అంతే కాదు మీతో పాటు మీ పెంపుడు జంతువుల‌ను కూడా అక్క‌డికి తీసుకెళ్లి స‌ర‌దాగా ఎంజాయ్ చేయొచ్చు. శామీర్‌పేట్ చెరువుకు స‌మీపంలోని జింక‌ల పార్కు ఉంది. ఈ పార్కు కృష్ణ జింక‌ల‌కు నిల‌యం.

దుర్గం చెరువు..

దుర్గం చెరువు హైద‌రాబాదీల‌కు కొత్తేం కాదు.. చెరువును, పార్కును సుంద‌రీక‌రించిన త‌ర్వాత ప‌ర్యాట‌కుల తాకిడి ఎక్కువైంది. ఫోటోషూట్‌కు కూడా ఈ ప్లేస్ ప్ర‌సిద్ధి చెందింది. ప‌చ్చ‌టి చెట్ల మ‌ధ్య‌లో ఏర్పాటు చేసిన బెంచీల‌పై విశ్రాంతి తీసుకోవ‌చ్చు. ఈవినింగ్ టైమ్‌లో దుర్గం చెరువుకు వెళ్తే ఫుల్ ఎంజాయ్ చేయొచ్చు. ఇక్క‌డికి వెళ్లిన‌ప్పుడు త‌ప్ప‌కుండా కెమెరా తీసుకెళ్లాల్సిందే.

వీటితో పాటు నెహ్రూ జూలాజిక‌ల్ పార్కు, గోల్కొండ ఫోర్ట్, బొటానిక‌ల్ గార్డెన్స్ కూడా మంచి పిక్నిక్ స్పాట్స్. ఈ ప్రాంతాల్లో కూడా కుటుంబ స‌భ్యుల‌తో క‌లిసి స‌ర‌దాగా గ‌డ‌పొచ్చు. ఇంకెందుకు ఆల‌స్యం పిల్ల‌ల‌తో క‌లిసి అలా విహ‌రించండి..