ఆ రెండు చెరువులకు సరికొత్త అందాలు

చెరువుల పరిరక్షణ, సుందరీకరణే లక్ష్యంగా హైదరాబాద్‌ మెట్రోపాలిటన్‌ డెవలప్‌మెంట్‌ అథారిటీ (హెచ్‌ఎండీఏ) పనిచేస్తున్నది. గ్రేటర్‌ హైదరాబాద్‌తో పాటు శివారు ప్రాంతాల్లో ఉన్న చెరువుల సుందరీకరణకు భారీ మొత్తంలో నిధులను కేటాయించి పనులు చేపడుతున్నది.

July 17, 2023 / 03:45 AM IST

రూ.16.95 కోట్లతో సుందరీకరణ పనులు
మల్కాజిగిరి ఆర్కే పురంలోని ముక్కిడి చెరువు కూకట్‌పల్లిలోని రంగధాముని చెరువు ప్రధాన కట్టల ఆధునీకరణ
పనులు చేపట్టేందుకు టెండర్లు పిలిచిన హెచ్‌ఎండీఏ

సిటీబ్యూరో, జూలై 16 (నమస్తే తెలంగాణ): చెరువుల పరిరక్షణ, సుందరీకరణే లక్ష్యంగా హైదరాబాద్‌ మెట్రోపాలిటన్‌ డెవలప్‌మెంట్‌ అథారిటీ (హెచ్‌ఎండీఏ) పనిచేస్తున్నది. గ్రేటర్‌ హైదరాబాద్‌తో పాటు శివారు ప్రాంతాల్లో ఉన్న చెరువుల సుందరీకరణకు భారీ మొత్తంలో నిధులను కేటాయించి పనులు చేపడుతున్నది. తాజాగా మల్కాజిగిరి నియోజకవర్గం ఆర్‌.కె.పురం పరిధిలోని ముక్కిడి చెరువు, కూకట్‌పల్లిలోని రంగధాముని చెరువుల వద్ద రూ.16.95 కోట్లతో పనులు చేపట్టేందుకు హెచ్‌ఎండీఏ ఇంజినీరింగ్‌ విభాగం అధికారులు ప్రత్యేకంగా ప్రతిపాదనలు సిద్ధం చేశారు. ఈ పనులను వెంటనే చేపట్టేందుకు వేర్వేరుగా మూడు టెండర్లను పిలిచారు. ఈ నెలాఖరులోగా టెండర్ల ప్రక్రియను పూర్తి చేసి, చెరువుల సుందరీకరణను చేపట్టేలా కార్యాచరణ సిద్ధం చేశారు. హెచ్‌ఎండీఏ పరిధిలో ఉన్న లేక్‌ ప్రొటెక్షన్‌ కమిటీ చెరువులకు సంబంధించి పూర్తి స్థాయి విస్తీర్ణం, ఎఫ్‌టీఎల్‌లను గుర్తించి ఫైనల్‌ నోటిఫికేషన్‌ జారీ చేసి చెరువులు కబ్జా కాకుండా చర్యలు చేపట్టారు.