Protein Food For Fertility | సంతానోత్పత్తికి.. తోడ్పడే పోషకాఆహారం

రకరకాల పోషకాలతో కూడిన ఆహారం ఆరోగ్యానికి ఎంతో ముఖ్యం. ప్రత్యేకించి, కొన్ని అనారోగ్యాలను దూరంగా ఉంచడానికి కొన్నిరకాల పోషకాలు చాలా అవసరం. అలా సంతానోత్పత్తికి తోడ్పడే ఆహార పదార్థాలూ అనేకం ఉన్నాయి.

రంగురంగుల కూరగాయలు
ఇంద్ర ధనుస్సులోని అన్నిరంగుల్లో దొరికే కూరగాయలను ఆహారంలో చేర్చుకోవాలి. అలా అనేకానేక యాంటీ ఆక్సిడెంట్లు, విటమిన్లు, ఖనిజ లవణాలు అందుతాయి. ఇవన్నీ వీర్యం, అండాల ఆరోగ్యాన్ని మెరుగు పరుస్తాయి.

నట్స్‌
వాల్‌నట్స్‌లోని యాంటీ ఆక్సిడెంట్స్‌, బ్రెజిల్‌ నట్స్‌లోని సెలీనియం, పైన్‌ గింజల్లోని ఆర్జినైన్‌ మొదలైన పోషకాలు శరీరంలోని వేడిని, మంటను తగ్గిస్తాయి. దీంతో అండాశయంలో అండం నాణ్యత మెరుగై సంతానోత్పత్తికి మార్గం సుగమం అవుతుంది.

పీచు పదార్థాలు
పీచు ఎక్కువగా ఉండే ఓట్స్‌, క్వినోవా, బ్రౌన్‌ రైస్‌, హోల్‌మీల్‌ పాస్తా, పొట్టుతీయని గోధుమతో చేసిన బ్రెడ్‌ మొదలైనవి హార్మోన్లను క్రమబద్ధీకరిస్తాయి. గర్భాశయ పొరలను మందంగా మార్చి, పిండం నిలిచేలా చేస్తాయి.

ఎక్స్‌ట్రా వర్జిన్‌ ఆలివ్‌ నూనె
ఇందులోని మోనోశాచ్యురేటెడ్‌ ఫ్యాట్స్‌, ఒమెగా-3 ఫ్యాటీ ఆమ్లాలు సంతానోత్పత్తి హార్మోన్లను మెరుగుపరుస్తాయి. గర్భాశయానికి రక్త ప్రసరణ బాగా జరిగేలా చేస్తాయి. విటమిన్‌-ఇ గర్భాశయ గోడలను మందం చేస్తుంది.