Laugh | మాన‌సిక ఒత్తిడిని త‌గ్గించేందుకు ఎంతో దోహ‌దం చేసే న‌వ్వు.. బ‌ల‌వంతంగా న‌వ్వ‌కూడ‌దు.. వెల్ల‌డించిన ప‌రిశోధ‌కులు..

చిరునవ్వు ముఖానికి అందాన్ని తీసుకురావడమే కాకుండా మనసుకు ఉల్లాసాన్ని అందించి ఒత్తిడిని తగ్గించడంలోనూ సహాయపడుతుందని నిపుణులు చెబుతున్నారు. నవ్వడానికి ఏదైనా ప్రత్యేక కారణం కోసం ఎదురుచూడాల్సిన అవసరం లేదని, మనసు బాగాలేని సమయంలో కూడా చిరునవ్వు నవ్వేందుకు ప్రయత్నించడం వల్ల భావోద్వేగాల్లో మార్పు వ‌స్తుంద‌ని పరిశోధనలు సూచిస్తున్నాయి.

Laugh | చిరునవ్వు ముఖానికి అందాన్ని తీసుకురావడమే కాకుండా మనసుకు ఉల్లాసాన్ని అందించి ఒత్తిడిని తగ్గించడంలోనూ సహాయపడుతుందని నిపుణులు చెబుతున్నారు. నవ్వడానికి ఏదైనా ప్రత్యేక కారణం కోసం ఎదురుచూడాల్సిన అవసరం లేదని, మనసు బాగాలేని సమయంలో కూడా చిరునవ్వు నవ్వేందుకు ప్రయత్నించడం వల్ల భావోద్వేగాల్లో మార్పు వ‌స్తుంద‌ని పరిశోధనలు సూచిస్తున్నాయి. దీనినే ఫేషియల్‌ ఫీడ్‌బ్యాక్‌ హైపోథసిస్‌ అంటారు. 1980వ దశకంలో నిర్వహించిన ఓ పరిశోధనలో పాల్గొన్నవారిని పెదవుల మధ్య పెన్సిల్‌ పెట్టుకుని నవ్వుతున్నట్లు లేదా కోపంగా ఉన్నట్లు ముఖ కవళికలు ప్రదర్శించమని కోరారు. ఆ సమయంలో సరదా దృశ్యాలను చూపించారు. నవ్వుతున్న ముఖ కవళికలు ప్రదర్శించిన కొందరు ఆ దృశ్యాలను మరింత ఆస్వాదించినట్లు పరిశోధకులు గుర్తించారు. అంటే ముఖ కవళికలు మన భావోద్వేగాలపై ప్రభావం చూపే అవకాశం ఉందని ఈ పరిశోధన తెలియజేస్తోంది.

ఒత్తిడి హార్మోన్లు త‌గ్గేందుకు..

చిరునవ్వు శరీరంలో ఒత్తిడికి సంబంధించిన హార్మోన్‌ అయిన కార్టిసాల్‌ స్థాయిలపై ప్రభావం చూపిస్తుంది. అలాగే సంతోషకరమైన భావాలకు సంబంధించిన ఎండార్ఫిన్లు, డోపమైన్‌, సెరోటోనిన్‌ వంటి మెదడు రసాయనాల పనితీరును కూడా ప్రభావితం చేస్తుంది. ఆందోళన, మానసిక కుంగుబాటుతో బాధపడేవారు చిరునవ్వును ఒక అదనపు సాధనంగా ఉపయోగించుకోవచ్చని మానసిక నిపుణులు సూచిస్తున్నారు. అయితే ఇది ఒక్కటే అన్ని సమస్యలకు పరిష్కారం కాదని స్పష్టం చేస్తున్నారు. ఒత్తిడితో కూడిన పనులు చేస్తున్నప్పుడు చిరునవ్వుతో ఉన్నవారిలో, తటస్థమైన ముఖ కవళికలతో ఉన్నవారితో పోలిస్తే, ఆ పని పూర్తయిన తర్వాత గుండె వేగం త్వరగా సాధారణ స్థితికి చేరినట్లు కొన్ని అధ్యయనాలు వెల్లడించాయి. చిరునవ్వు శరీరంలో ఒత్తిడికి సంబంధించిన ప్రతిస్పందనలను తగ్గించడంలోనూ తోడ్పడుతుంద‌ని నిపుణులు చెబుతున్నారు.

ఆ దేశం.. న‌వ్వుల దేశం..

అయితే చిరునవ్వును చూసే విధానం అన్ని సంస్కృతుల్లో ఒకేలా ఉండదు. అమెరికా వంటి పాశ్చాత్య దేశాల్లో సానుకూల భావోద్వేగాలకు ఎక్కువ ప్రాధాన్యం ఇస్తారని, తూర్పు ఆసియా దేశాల్లో మాత్రం సంతోషం, బాధ వంటి భావాల మధ్య సమతుల్యతకు ప్రాధాన్యం ఉంటుందని పరిశోధకులు చెబుతున్నారు. ప్రశాంతంగా, స్వల్పంగా నవ్వడాన్ని కొందరు ఇష్టపడితే, మరికొందరు దంతాలు కనిపించేలా పెద్దగా నవ్వడాన్ని స్నేహపూర్వకంగా భావిస్తారు. అయితే తైవాన్‌, దక్షిణ కొరియా, జపాన్‌, హాంకాంగ్‌ వంటి ప్రాంతాల్లో నిర్వహించిన కొన్ని అధ్యయనాల్లో పెద్దగా నవ్వే ముఖ కవళికలను కొందరు భావోద్వేగ అస్థిరతకు లేదా నమ్మదగనితనానికి సంకేతంగా కూడా భావించినట్లు గుర్తించారు. థాయ్‌లాండ్‌ను చిరునవ్వుల దేశంగా పిలుస్తారు. అక్కడ చిరునవ్వుకు ప్రత్యేకమైన సాంస్కృతిక ప్రాధాన్యం ఉంది. పిల్లలు, సహోద్యోగులతో మాట్లాడేటప్పుడు చిరునవ్వు నవ్వడం గౌరవం, మర్యాద, ప్రశాంతతను తెలియజేస్తుందని భావిస్తారు. పాఠశాలల్లో కూడా పిల్లలు సంతోషంగా ఉండే వాతావరణాన్ని కల్పించేందుకు చిరునవ్వును ప్రోత్సహిస్తున్నారు.

బ‌లవంతం వ‌ద్దు..

అయితే ప్రతి సందర్భంలోనూ నవ్వాలని ఇతరులు బలవంతం చేయడం సరైనది కాదు. ముఖ్యంగా కార్యాలయాల్లో మహిళలు తప్పనిసరిగా నవ్వుతూ ఉండాలనే అంచనాలపై గత కొంతకాలంగా చర్చ జరుగుతోంది. కొందరు మహిళలు లేదా ఇతర వర్గాలకు చెందినవారు నవ్వకపోతే వారిని స్నేహపూర్వకంగా లేరని భావించే ధోరణి కూడా ఉంది. ఉద్యోగులు కస్టమర్లను చూసినప్పుడు తప్పనిసరిగా నవ్వాలని, పలకరించాలని కొన్ని సంస్థలు నిబంధనలు విధించడం విమర్శలకు దారితీసింది. మనస్ఫూర్తిగా, స్వచ్ఛందంగా నవ్వినప్పుడే దాని వల్ల నిజమైన మానసిక ప్రయోజనం కలుగుతుందని నిపుణులు చెబుతున్నారు. బలవంతంగా నవ్వాల్సి వస్తే అది మరింత ఒత్తిడికి దారితీస్తుంది. కుటుంబ సభ్యులతో రాజకీయాలు, మతం వంటి సున్నితమైన విషయాలపై చర్చలు జరిగినప్పుడు కూడా చిరునవ్వుతో స్పందించడం వల్ల ఎదుటివారిపై మన స్పందనలో మార్పు వ‌స్తుంది. మనపై శ్రద్ధ చూపించే, ప్రేమించే వ్యక్తితో మాట్లాడుతున్నామనే భావనతో ప్రశాంతంగా స్పందించేందుకు చిరునవ్వు తోడ్పడుతుందని నిపుణులు అభిప్రాయపడుతున్నారు.