Health Tips | ఇటీవల చాలామందిలో థైరాయిడ్ సమస్య కనిపిస్తున్నది. ప్రత్యేకించి, హైపో థైరాయిడిజం గురించి నాకో సందేహం ఉంది. సెక్స్ పట్ల అయిష్టత, సంతాన సాఫల్య సమస్యకు ఈ రుగ్మతతో ఏమైనా సంబంధం ఉందా? నేను కూడా హైపో థైరాయిడిజంతో బాధపడుతున్నా. ఓ పరిష్కారం చెప్పండి ప్లీజ్.
-ఓ పాఠకురాలు
థైరాయిడ్ గ్రంథి అనేది సంతానలేమి విషయంలో చాలా పెద్ద పాత్ర పోషిస్తుంది. దానికి వెంటనే చికిత్స అందించాలి. ఇలాంటి వాళ్లు గర్భం ధరించినప్పుడు మొదటి మూడు నెలల్లో గర్భస్థ పిండం థైరాయిడ్ను తయారు చేసుకోలేదు. అలాంటి సమయంలో తల్లికి థైరాయిడ్ డోస్ ఎక్కువ ఇస్తాం. ఎందుకంటే ఇది తల్లి నుంచి బిడ్డకు వెళ్లాలి. న్యూరలాజికల్ డెవలప్మెంట్.. అంటే మెదడు, నాడీ వ్యవస్థలాంటివి తయారయ్యేందుకు కూడా థైరాయిడ్ చాలా ముఖ్యం. థైరాయిడ్ సమస్య వల్ల సమయానికి అండం విడుదల కాదు. సక్రమంగా నెలసరి రాదు. థైరాయిడ్ గ్రంథి పనిచేయకపోతే ఈస్ట్రోజెన్ హార్మోన్ ఎక్కువ అవుతుంది. ఫలితంగా, నెలసరిలో అధిక రక్తస్రావం అవుతుంది. సంతాన సమస్యలు ఏర్పడతాయి.
నెలసరి ఎగుడు దిగుడుల వల్ల చాలామంది దీన్ని పాలీసిస్టిక్ ఒవేరియన్ సిండ్రోమ్ (పీసీఓఎస్)గా పొరబడతారు. అలాంటి అనుమానం వచ్చినప్పుడు థైరాయిడ్ టెస్ట్ చేయించుకోవాలి. అలా అని, ఇది కంగారు పడాల్సిన విషయం ఏమీ కాదు. కాలుష్యం వల్ల శరీరంలో అయోడిన్ తక్కువైనా ఇలా జరుగుతుంది. థైరాయిడ్ హార్మోన్ ఉత్పత్తికి అయోడిన్ చాలా ముఖ్యం. అందుకే అయోడైజ్డ్ ఉప్పును సూచిస్తుంటాం. ఇక, సెక్స్ విషయంలో విముఖతకు, థైరాయిడ్కు పెద్దగా సంబంధం లేదనే చెప్పవచ్చు. పరీక్షల ద్వారానే కారణాన్ని నిర్ధారించగలం.
– డాక్టర్ పి. బాలాంబ,
సీనియర్ గైనకాలజిస్ట్