నీళ్ల నుంచి పుట్టిన మంట

హైడ్రోజన్‌ పెరాక్సయిడ్‌ అంటే చాలామందికి తెలిసే ఉంటుంది. హెచ్‌2ఓ2 అనే రసాయన సంకేతాన్ని కలిగి ఉండే ఈ ద్రవ పదార్థాన్ని గాయాలు కడగడం మొదలుకుని దంతాలను మిలమిలలాడేలా చేసుకోవడం వరకు చాలా సందర్భాల్లో వినియోగిస్తుంటారు.

హైడ్రోజన్‌ పెరాక్సయిడ్‌ అంటే చాలామందికి తెలిసే ఉంటుంది. హెచ్‌2ఓ2 అనే రసాయన సంకేతాన్ని కలిగి ఉండే ఈ ద్రవ పదార్థాన్ని గాయాలు కడగడం మొదలుకుని దంతాలను మిలమిలలాడేలా చేసుకోవడం వరకు చాలా సందర్భాల్లో వినియోగిస్తుంటారు. అయితే, దీన్ని అవసరానికి మించి ఉపయోగించడం వల్ల ఆరోగ్య సమస్యలు తలెత్తుతాయంటున్నారు నిపుణులు.

• హైడ్రోజన్‌ పెరాక్సయిడ్‌ అనేది యాంటీసెప్టిక్‌గా పనిచేస్తుంది. వైద్యపరంగా దీన్ని విస్తృతంగా ఉపయోగిస్తారు. కానీ, తగిన విధంగా వాడకపోతే మాత్రం ఆరోగ్యం మీద తీవ్రమైన ప్రభావాలే చూపుతుంది.
• ఈ ద్రావకాన్ని చర్మానికి పట్టించినప్పుడు మంట, ఎర్రగా మారిపోవడం, కొన్నిసార్లు బొబ్బలెక్కే ప్రమాదం కూడా ఉంది. ఎవరో చెప్పారు కదా అని అధిక పరిమాణంలో దీన్ని వాడితే ప్రమాదకరంగా పరిణమిస్తుంది.
• హైడ్రోజన్‌ పెరాక్సయిడ్‌ను కొద్ది పరిమాణంలో కూడా నోట్లోకి తీసుకోకూడదు. ఇలా చేస్తే పొట్టకు సంబంధించిన సమస్యలు తలెత్తుతాయి. వికారం, వాంతులు, అంతర్గత రక్తస్రావం మొదలైన ఇబ్బందులు వస్తాయి. అంతేకాదు రక్తనాళాల్లో గాలి బుడగలు ఏర్పడి రక్త సరఫరాకు ఆటంకంకలుగుతుంది. వైద్యపరంగా ఈ పరిస్థితిని గ్యాస్‌ ఎంబాలిజం అంటారు. ఇది ప్రాణాలకు ప్రమాదం కూడా కలిగించవచ్చు.
• ఈ ద్రవాన్ని ముక్కుతో పీలిస్తే శ్వాసనాళంలో మంట కలిగిస్తుంది. దగ్గు వస్తుంది. ఊపిరి తీసుకోవడం మందగిస్తుంది. విపత్కర పరిస్థితుల్లో
  ఊపిరితిత్తుల్లో ఫ్లూయిడ్‌ పేరుకుపోయే పరిస్థితి అయిన పల్మనరీ ఎడెమాకు దారితీయొచ్చు.
• హైడ్రోజన్‌ పెరాక్సయిడ్‌ కంటికి తగిలితే విపరీమైన మంట, నొప్పి పుడతాయి. పైగా కొన్ని తీవ్రమైన సందర్భాల్లో చూపు పోయే ప్రమాదం కూడా ఉంది. ఇలాంటి సమయాల్లో నష్ట నివారణ కోసం ఏమాత్రం ఆలస్యం చేయకుండా వైద్యుడిని సంప్రదించాలి. తగిన చికిత్స చేయించుకోవాలి.