నాకు రెండేండ్ల క్రితం పెండ్లయింది. ఉద్యోగరీత్యా ఏడాదిన్నరగా మేమిద్దరం దూరంగా ఉంటున్నాం. ఆరు నెలల నుంచీ నా వ్యక్తిగత భాగాల్లో విపరీతంగా దురద వస్తున్నది. ఆ సమయంలో కోసుకుపోయినట్టు అనిపిస్తుంది. నీళ్లు తగిలినా మంటగా ఉంటుంది. దురదతోపాటు తరకలుగా వైట్ డిశ్చార్జ్ అవుతున్నది. ఫంగల్ ఆయింట్మెంట్లు వాడినా ఫలితం కనిపించడం లేదు. ఎవరికైనా చెప్పాలంటేనే సిగ్గుగా ఉంది. దయచేసి, మంచి మందులు సూచించండి.
వ్యక్తిగత భాగాల్లో దురద ఉందని అంటున్నారు కాబట్టి, ముందుగా షుగర్ టెస్ట్ చేయించుకోండి. ఆ ఇబ్బందికి ఇదీ ఒక కారణం కావచ్చు. అలాగే మీరు, మీ వారు ఈ ఏడాదిన్నరలో కలిశారా లేదా అన్నదీ ముఖ్యమే. ఒక వేళ కలిసి ఉంటే, ఆయన్ని కూడా షుగర్ టెస్ట్ చేయించుకోమని చెప్పండి. ఇద్దరిలో ఏ ఒక్కరికి మధుమేహం ఉన్నా ఈ సమస్య తలెత్తవచ్చు. ఇలాంటి ఇన్ఫెక్షన్లు వచ్చినప్పుడు ఆ భాగాల్లో డెటాల్లాంటి యాంటీ సెప్టిక్ మందులు పూయకూడదు. అయినా ఇదేమంత ప్రమాదకరం కాదు.
సిగ్గుపడాల్సిన విషయమూ లేదు. మంచి గైనకాలజిస్టును లేదా డెర్మటాలజిస్టును సంప్రదిస్తే యాంటీ ఫంగల్ మాత్రలు ఇస్తారు. దురద తగ్గేందుకు కొన్ని నియమాలు చెబుతారు.
-(వైద్య నిపుణుల సలహా కోసం మహిళా పాఠకులు తమ సమస్యల్ని zindagi@ntnews.com కు మెయిల్ చేయవచ్చు)