H1N1 | దేశంలో చాలా చోట్ల పెరుగుతున్న హెచ్‌1ఎన్‌1 కేసులు.. ఈ ల‌క్ష‌ణాలు క‌నిపిస్తే జాగ్ర‌త్త ప‌డాల్సిందే..

దేశంలో అనేక చోట్ల‌ హెచ్1ఎన్1 కేసులు పెరుగుతున్న నేపథ్యంలో ప్రజలు అప్రమత్తంగా ఉండాలని నిపుణులు సూచిస్తున్నారు. ముఖ్యంగా జలుబు, దగ్గు, జ్వరం వంటి లక్షణాలు కనిపించినప్పుడు రద్దీగా ఉండే ప్రదేశాలకు వెళ్లకుండా, ఇతరులతో కలవకుండా జాగ్రత్తలు తీసుకోవాలని సూచిస్తున్నారు.

H1N1 | దేశంలో అనేక చోట్ల‌ హెచ్1ఎన్1 కేసులు పెరుగుతున్న నేపథ్యంలో ప్రజలు అప్రమత్తంగా ఉండాలని నిపుణులు సూచిస్తున్నారు. ముఖ్యంగా జలుబు, దగ్గు, జ్వరం వంటి లక్షణాలు కనిపించినప్పుడు రద్దీగా ఉండే ప్రదేశాలకు వెళ్లకుండా, ఇతరులతో కలవకుండా జాగ్రత్తలు తీసుకోవాలని సూచిస్తున్నారు. చిన్నారులు, వృద్ధులు, గర్భిణీలు, ఇతర ఆరోగ్య సమస్యలు ఉన్నవారు ఈ వైరస్‌ వల్ల వచ్చే సమస్యలకు ఎక్కువగా గురయ్యే అవకాశం ఉందని చెబుతున్నారు. దేశ రాజ‌ధాని ఢిల్లీలో నమోదవుతున్న ఇన్‌ఫ్లుయెంజా కేసుల్లో సుమారు 70 శాతం హెచ్1ఎన్1 కేసులు ఉన్నట్లు నిపుణులు తెలిపారు. సాధారణంగా స్వైన్ ఫ్లూగా పిలిచే హెచ్1ఎన్1 వైరస్‌ ప్రస్తుతం చిన్నారుల్లో, ముఖ్యంగా ఐదేళ్లలోపు పిల్లల్లో ఎక్కువ ఇబ్బందులను కలిగిస్తున్నట్లు పేర్కొన్నారు. రెండేళ్లలోపు పిల్లల్లో అధిక జ్వరం వంటి లక్షణాలు ఎక్కువగా కనిపిస్తున్నాయని తెలిపారు.

ఎలాంటి ల‌క్ష‌ణాలు ఉంటాయి..

అంతర్లీన ఆరోగ్య సమస్యలు ఉన్న పిల్లల్లో ఇన్‌ఫ్లుయెంజా తీవ్రత ఎక్కువగా ఉండే అవకాశం ఉంటుంది. ముఖ్యంగా రెండేళ్లలోపు పిల్లలు తినడం, తాగడం మానేయడం, 103 నుంచి 104 డిగ్రీల ఫారెన్‌హీట్‌ వరకు అధిక జ్వరం రావడం వంటి లక్షణాలు కనిపిస్తే ప్రత్యేక శ్రద్ధ అవసరం. ప్రస్తుతం వ్యాప్తి చెందుతున్న వైరస్‌లో వచ్చిన మార్పును యాంటీజెనిక్ డ్రిఫ్ట్‌గా పేర్కొంటున్నారు. ఇది 2009లో కనిపించిన వైరస్‌ మార్పు తరహాలో పెద్ద స్థాయిలో వచ్చిన యాంటీజెనిక్ షిఫ్ట్‌ కాదని నిపుణులు స్పష్టం చేస్తున్నారు. ప్రస్తుత ఇన్‌ఫ్లుయెంజా వైరస్‌ లక్షణాల్లో తీవ్రమైన ఒళ్లు నొప్పులు, అధిక జ్వరం ప్రధానంగా కనిపిస్తున్నాయి. ముఖ్యంగా 103 నుంచి 104 డిగ్రీల ఫారెన్‌హీట్‌ వరకు జ్వరం ఉండటం ఈ వైరస్‌ సంక్రమణలో గమనించాల్సిన ముఖ్యమైన లక్షణంగా చెబుతున్నారు. కోవిడ్‌-19 లేదా ఇతర వైరల్‌ ఇన్‌ఫెక్షన్లతో పోల్చినప్పుడు ప్రస్తుత హెచ్1ఎన్1 ఇన్‌ఫ్లుయెంజాలో ఈ లక్షణాలు స్పష్టంగా కనిపిస్తున్నాయ‌ని నిపుణులు పేర్కొన్నారు.

ఎవ‌రికి రిస్క్ ఎక్కువ‌..

పిల్లలతో పాటు వృద్ధులు, గర్భిణీలు, రోగనిరోధక శక్తి తక్కువగా ఉన్నవారు కూడా హెచ్1ఎన్1 వల్ల వచ్చే సమస్యలకు ఎక్కువగా గురయ్యే అవకాశం ఉంటుంది. మధుమేహం, గుండె, మూత్రపిండాలు, కాలేయ సంబంధిత వ్యాధులు, క్యాన్సర్‌, ఆస్తమా, సీవోపీడీ వంటి శ్వాసకోశ సమస్యలు ఉన్నవారిలో ఇన్‌ఫ్లుయెంజా న్యూమోనియా వంటి తీవ్రమైన సమస్యలకు దారితీసే ప్రమాదం ఎక్కువగా ఉంటుందని నిపుణులు చెబుతున్నారు. సాధారణంగా ఇన్‌ఫ్లుయెంజా సోకినవారు 7 నుంచి 10 రోజుల్లో కోలుకునే అవకాశం ఉంటుంది. అయితే అధిక ప్రమాదం ఉన్న వర్గాలకు చెందినవారు లక్షణాలు కనిపించిన వెంటనే వైద్యులను సంప్రదించడం మంచిది. ముఖ్యంగా అధిక జ్వరం, శ్వాస తీసుకోవడంలో ఇబ్బంది, తినడం లేదా తాగడం మానేయడం వంటి లక్షణాలను నిర్లక్ష్యం చేయకూడదు.

యాంటీ వైర‌ల్ మందుల‌నే వాడాలి..

హెచ్1ఎన్1 వంటి ఇన్‌ఫ్లుయెంజా వైరస్‌కు యాంటీబయాటిక్స్‌ పనిచేయవు. ఇవి బ్యాక్టీరియా వల్ల కలిగే ఇన్‌ఫెక్షన్ల చికిత్సకు ఉపయోగపడతాయి. ఇన్‌ఫ్లుయెంజా చికిత్సలో యాంటీవైరల్‌ మందులను వైద్యులు సూచించిన‌వే వాడాలి. ముఖ్యంగా వైరస్‌ సంక్రమణ ప్రారంభ దశలోనే సరైన చికిత్స తీసుకోవడం ఉపయోగకరంగా ఉంటుంది. అయితే మందులను స్వయంగా తీసుకోకుండా వైద్యుల సూచన మేరకు మాత్రమే ఉపయోగించాలి. హెచ్1ఎన్1 వ్యాప్తిని తగ్గించేందుకు కొన్ని సాధారణ జాగ్రత్తలు పాటించడం అవసరం. ప్రతి ఏడాది ఇన్‌ఫ్లుయెంజా వ్యాక్సిన్‌ తీసుకోవడం, చేతులను తరచూ శుభ్రంగా కడుక్కోవడం, జ్వరం లేదా ఇతర లక్షణాలు ఉన్నప్పుడు రద్దీ ప్రదేశాలకు దూరంగా ఉండటం, అవసరమైన సందర్భాల్లో మాస్క్‌ ధరించడం వంటి చర్యలు వైరస్‌ వ్యాప్తి ప్రమాదాన్ని తగ్గించడంలో సహాయపడతాయి. ఆరోగ్యకరమైన జీవనశైలిని పాటించడం కూడా శరీర రోగనిరోధక శక్తిని కాపాడుకోవడంలో ఉపయోగపడుతుందని నిపుణులు తెలియ‌జేస్తున్నారు.