Green Tea Vs Black Tea | గ్రీన్ టీ వ‌ర్సెస్ బ్లాక్ టీ.. రెండింటిలో ఏది ఎక్కువ మేలు చేస్తుంది.. ఎవ‌రు దేన్ని తాగాలి..?

ప్రపంచంలో అత్యంత ప్రజాదరణ పొందిన పానీయాల్లో టీ ఒకటి. భారత్‌లో ఉదయం, సాయంత్రం టీ తాగడం చాలామందికి రోజువారీ అలవాటుగా మారింది. అందుబాటులో ఉన్న అనేక రకాల టీలలో గ్రీన్ టీ, బ్లాక్ టీ ఎక్కువగా వినియోగంలో ఉన్నాయి.

Green Tea Vs Black Tea | ప్రపంచంలో అత్యంత ప్రజాదరణ పొందిన పానీయాల్లో టీ ఒకటి. భారత్‌లో ఉదయం, సాయంత్రం టీ తాగడం చాలామందికి రోజువారీ అలవాటుగా మారింది. అందుబాటులో ఉన్న అనేక రకాల టీలలో గ్రీన్ టీ, బ్లాక్ టీ ఎక్కువగా వినియోగంలో ఉన్నాయి. ఈ రెండూ కామెలియా సినెన్సిస్ అనే మొక్క ఆకుల‌ నుంచి తయారవుతున్నప్పటికీ, తయారీ విధానంలో ఉండే తేడాల కారణంగా వాటి రుచి, రంగు, ఆరోగ్య ప్రయోజనాలు భిన్నంగా ఉంటాయి. గ్రీన్ టీ ప్రాసెసింగ్ సమయంలో ఆక్సీకరణకు గురికాకుండా ఉండటంతో ఇందులో క్యాటెకిన్స్ అనే శక్తివంతమైన యాంటీఆక్సిడెంట్లు అధికంగా నిల్వ ఉంటాయి. ముఖ్యంగా ఈజీసీజీ (EGCG) అనే సమ్మేళనం జీవక్రియల ఆరోగ్యానికి, రక్తంలో చక్కెర నియంత్రణకు ఉపయోగపడుతుందని పరిశోధనలు సూచిస్తున్నాయి. మరోవైపు బ్లాక్ టీ పూర్తిగా ఆక్సీకరణకు గురవుతుంది. ఈ ప్రక్రియలో క్యాటెకిన్స్ థియాఫ్లావిన్స్, థియారుబిజిన్స్‌గా మారి గుండె ఆరోగ్యానికి, జీర్ణవ్యవస్థకు ప్రత్యేక ప్రయోజనాలు అందిస్తాయి.

యాంటీ ఆక్సిడెంట్ల‌కు నిల‌యం గ్రీన్ టీ..

గ్రీన్ టీని యాంటీ ఆక్సిడెంట్లకు మంచి వనరుగా పరిగణిస్తారు. ఇవి శరీరంలో ఆక్సిడేటివ్ ఒత్తిడిని తగ్గించడంలో, వాపుల‌ను నియంత్రించడంలో, దీర్ఘకాలిక వ్యాధుల ప్రమాదాన్ని తగ్గించడంలో సహాయపడతాయి. గ్రీన్ టీ తీసుకోవడం వల్ల మెదడు పనితీరు మెరుగుపడటం, కొవ్వు కరిగే ప్రక్రియ వేగవంతం కావడం, గుండె జబ్బుల ప్రమాదం తగ్గడం వంటి ప్రయోజనాలు ఉంటాయ‌ని అధ్యయనాలు చెబుతున్నాయి. గ్రీన్ టీలో ఉండే ఎల్-థియానిన్ అనే అమినో ఆమ్లం మనసుకు ప్రశాంతతను కలిగించడంతోపాటు ఏకాగ్రతను కూడా పెంచుతుంది. అలాగే ఈజీసీజీ కొవ్వు ఆక్సీకరణను పెంచి, పిండి పదార్థాల జీర్ణక్రియలో పాల్గొనే కొన్ని ఎంజైమ్‌లను నిరోధించడం ద్వారా భోజనం తర్వాత రక్తంలో చక్కెర ఒక్కసారిగా పెరగకుండా సహాయపడుతుంది. ఫ్రీ రాడికల్స్‌ను నిర్వీర్యం చేసి కాలేయ ఆరోగ్యాన్ని కాపాడటంలో, కణాల వృద్ధాప్యాన్ని మందగించడంలో కూడా ముఖ్య‌ పాత్ర పోషిస్తుంది.

జీర్ణాశ‌య ఆరోగ్యానికి మేలు చేసే బ్లాక్ టీ..

బ్లాక్ టీ గ్రీన్ టీ కంటే ఎక్కువ ఆక్సీకరణకు గురవుతుంది కాబట్టి దాని రంగు ముదురు గోధుమరంగులో ఉండి రుచి మరింత గాఢంగా ఉంటుంది. ఇందులో ఉండే థియాఫ్లావిన్స్, థియారుబిజిన్స్ అనే యాంటీ ఆక్సిడెంట్లు ఆరోగ్యానికి మేలు చేస్తాయి. పరిశోధనల ప్రకారం బ్లాక్ టీ జీర్ణాశయ ఆరోగ్యాన్ని మెరుగుపరచడం, కొలెస్ట్రాల్ స్థాయిలను తగ్గించడం, రక్తనాళాల పనితీరును మెరుగుపరచడం ద్వారా గుండె ఆరోగ్యానికి మద్దతు ఇస్తుంది. బ్లాక్ టీలో కెఫీన్ పరిమాణం గ్రీన్ టీ కంటే కొంత ఎక్కువగా ఉంటుంది. అందువల్ల ఇది త్వరగా శక్తిని అందిస్తుంది. కాఫీకి ప్రత్యామ్నాయంగా బలమైన పానీయం కోరుకునేవారికి బ్లాక్ టీని మంచి ఎంపికగా భావిస్తారు. అయితే ఈ రెండు టీలకు కొన్ని ప్రతికూలతలు కూడా ఉన్నాయి. గ్రీన్ టీలోని క్యాటెకిన్స్ మొక్కల ఆధారిత ఐరన్ శోషణను తగ్గించే అవ‌కాశాలు ఉంటాయి. అలాగే టానిన్లు లేదా కెఫిన్‌కు సున్నితంగా స్పందించే వ్యక్తుల్లో జీర్ణాశ‌య అసౌకర్యం కలిగించే అవకాశం ఉంటుంది.

దేన్ని తాగాలి..

బ్లాక్ టీని అధికంగా తీసుకుంటే ఆందోళన, నిద్రలేమి, యాసిడ్ రిఫ్లక్స్ వంటి సమస్యలు తలెత్తుతాయి. గ్రీన్ టీ మాదిరిగానే ఇది కూడా ఐరన్ శోషణను కొంతవరకు తగ్గించే అవకాశం ఉంటుందని అధ్యయనాలు సూచిస్తున్నాయి. ఏ టీ ఆరోగ్యకరమనే ప్రశ్నకు ఒకే సమాధానం ఉండదు. వ్యక్తిగత ఆరోగ్య లక్ష్యాల ఆధారంగా ఎంపిక మారుతుంది. రక్తంలో చక్కెర నియంత్రణ, టైప్-2 మధుమేహం ప్రమాదాన్ని తగ్గించడం, అధిక యాంటీ ఆక్సిడెంట్లు పొందడం లేదా ప్రశాంతతతో కూడిన పానీయం కోరుకునేవారికి గ్రీన్ టీ అనుకూలంగా ఉంటుంది. మరోవైపు కాఫీకి ప్రత్యామ్నాయంగా శక్తినిచ్చే పానీయం కావాలనుకునేవారు, గుండె ఆరోగ్యంపై దృష్టి పెట్టేవారు, జీర్ణవ్యవస్థకు మద్దతు కోరుకునేవారు లేదా గాఢమైన రుచిని ఇష్టపడేవారు బ్లాక్ టీని ఎంచుకోవచ్చు. గ్రీన్ టీ, బ్లాక్ టీ రెండింటికీ ప్రత్యేక ప్రయోజనాలు ఉంటాయి. పరిమిత మోతాదులో వీటిని తీసుకోవడం ద్వారా ఆరోగ్య ప్రయోజనాలు పొందవచ్చు. వ్యక్తిగత ఆరోగ్య పరిస్థితులు, అవసరాలను పరిగణనలోకి తీసుకుని ఎంపిక చేసుకోవడం ఉత్తమం. కొన్ని సందర్భాల్లో ఈ రెండింటినీ సమతుల ఆహారంలో భాగంగా చేర్చడం ద్వారా మరిన్ని విస్తృత ప్రయోజనాలు పొందే అవకాశం ఉంటుందని నిపుణులు తెలియ‌జేస్తున్నారు.