Visit:
కాలేయం మన శరీరంలో అతిపెద్ద గ్రంథి. కాలేయం దెబ్బతిన్న చాలా రోజుల తర్వాత మన శరీరం లక్షణాలను ప్రదర్శిస్తుంది. వీటిని నిర్లక్ష్యం చేస్తే మన జీవితం ప్రమాదంలో పడుతుంది. కాలేయం దెబ్బతిన్నప్పుడు ఎన్నో లక్షణాలు కనిపిస్తాయి. ముఖ్యంగా నాలుగు సంకేతాలను గుర్తించాలని వైద్యులు చెబుతున్నారు.
కాలేయం దెబ్బతిన్నదనడానికి చర్మం, కండ్లు పచ్చబడటం ఓ సంకేతం. వైద్య పరిభాషలో దీన్ని జాండిస్‌ (పసరికలు), స్ల్కీరల్‌ ఇక్టెరస్‌ అని పిలుస్తారు. ఈ హెచ్చరికను నిర్లక్ష్యం చేయకూడదు. చర్మం, గోళ్లు, కండ్లు పచ్చబడటాన్ని గుర్తించిన వెంటనే వైద్యులను సంప్రదించాలి. ఆలస్యం కూడదు.
పొట్టలో వాపు వచ్చి, అదెంతకూ తగ్గడం లేదంటే కాలేయం సరిగ్గా పనిచేయడం లేదన్నదానికి గుర్తు. ద్రవాలు పేరుకుపోవడంతో ఇలా జరుగుతుంది. కాలేయం సరిగ్గా పనిచేయనప్పుడు ద్రవాలు పొట్ట, కాళ్లలో పేరుకుపోతుంటాయి
ఎలాంటి కారణం లేకుండా వికారం, వాంతికి వచ్చినట్టు అనిపిస్తే కాలేయ సమస్య ఉన్నట్టు. అంతేకాదు, దేన్నీ తినలేకపోతున్నా ముఖ్యంగా మద్యం సేవించిన తర్వాత ఇలా అనిపిస్తే కాలేయం దెబ్బతిన్నది అనడానికి పెద్ద ప్రమాద హెచ్చరిక.
పొట్ట కుడి పైభాగంలో నొప్పిగా ఉండి, ఎంతకూ తగ్గకపోయినా కాలేయ సమస్యకు హెచ్చరికగా భావించాలి. హెపటైటిస్‌ కారణంగా ఇలా జరుగుతుందని గ్యాస్ట్రో ఎంటరాలజిస్టుల మాట. అంటే కాలేయంలో మంటగా ఉంటుంది. ఇదే కాకుండా వైరల్‌ ఇన్ఫెక్షన్‌, ఆల్కహాల్‌ కారణంగా కూడా ఇలా జరుగుతుంటుంది.
