పసిబిడ్డల చర్మం సున్నితమైంది. పెద్దలతో పోలిస్తే చాలా లేతగా ఉంటుంది. కాస్త సత్తువ సాధించుకోడానికి ఏడాది అయినా పడుతుంది. అప్పటివరకూ తల్లిదండ్రులు జాగ్రత్తగా ఉండాలి. బిడ్డ ఇన్ఫెక్షన్లపాలు కాకుండా కాపాడుకోవాలి. స్నానం చేయిస్తున్నప్పుడు, బట్టలు తొడుగుతున్నప్పుడు, లోషన్లు రాస్తున్నప్పుడు.. సున్నితంగా వ్యవహరించాలి.
ఎక్కడైనా కందిపోయినట్టు అనిపించినా, దద్దుర్లు, వాపు ఉన్నట్టు అనుమానం వచ్చినా వెంటనే వైద్యులను సంప్రదించాలి. టాల్కమ్ పౌడర్లు, క్రీమ్లు ఎంచుకుంటున్నప్పుడు.. నాణ్యమైన ఉత్పత్తులకే ప్రాధాన్యం ఇవ్వాలి. పరిశుభ్రత పేరుతో రోజుకు మూడునాలుగుసార్లు స్నానం చేయించడమూ సరికాదు. ప్రతిసారీ సబ్బు రుద్దడం అసలు మంచిది కాదు. రోజుకు రెండు పూటల స్నానం సరిపోతుంది. అదీ గోరువెచ్చని నీళ్లతోనే.