‘బ్రెయిన్‌ ఫాగ్‌’ను నిలువరిద్దాం!

శరీరంలో అతిముఖ్యమైన మెదడు సంబంధిత వ్యాధులపై చాలామందికి అవగాహన ఉండదు. దీంతో, సమస్య ముదిరి పోయాక కానీ గుర్తించరు. వాటిలో ఒకటి ‘బ్రెయిన్‌ ఫాగ్‌’. ఏ విషయంపైనా పూర్తి స్థాయిలో ఫోకస్‌ చేయలేక పోవడం, నిర్ణయాల్లో స్పష్టత లేకపోవడం, దీర్ఘకాలిక కుంగుబాటు, జ్ఞాపకశక్తి సమస్యలు.. బ్రెయిన్‌ ఫాగ్‌ లక్షణాలు. మంచు కమ్మేసినప్పుడు ఎదురుగా ఉన్న వస్తువుకూడా స్పష్టంగా కనిపించదు. ఇక్కడా అదే పరిస్థితి. ఒత్తిడి, నిద్రలేమి, హార్మోన్‌ అసమతౌల్యం, పోషకాల లోపం ఇందుకు కారణం కావచ్చు. కొన్ని రకాల వ్యాధులకు తీసుకునే ఔషధాల దుష్పభావమూ ఉండవచ్చు. ప్రాథమికంగా జీవనశైలి లోపాలను సరిచేసుకుంటే దారికి వస్తుంది. దీర్ఘకాలం వెంటాడితే మాత్రం వైద్యుల సలహా తీసుకోవాల్సిందే.