గుండెపోటుకు సాలీడు వైద్యం

విజ్ఞానం అద్భుతమైంది. ప్రమాదకరమని అందరూ భయపడిన పదార్థమూ కొన్నిసార్లు ప్రాణాలను కాపాడుతుంది. అందుకు సాక్ష్యమే ఈ పరిశోధన. ఆస్ట్రేలియాలో కనిపించే ‘ఫనెల్‌ వెబ్‌ స్పైడర్‌’ అనే సాలీడు కాటును విష పూరితంగా భావిస్తారు. సమయానికి చికిత్స అందకపోతే ప్రాణాంతకం అవుతుంది. ఆ విషమే లక్షల ప్రాణాలను కాపాడే అవకాశం ఉన్నదని తెలుస్తున్నది. అవును! గుండెపోటు వచ్చినప్పుడు ఒక్కసారిగా ఆ అవయవానికి రక్తసరఫరా తగ్గిపోతుంది. ఫలితంగా గుండె కణాలకు ఇక చనిపోయామనే సంకేతం అందుతుంది. ఈ సంకేతాన్ని ఆపగలిగితే మాత్రం ప్రాణాన్ని కాపాడినట్టే. ‘ఫనెల్‌ వెబ్‌ స్పైడర్‌’ విషంలోని Hi1a అనే ప్రొటీనుకు ఈ సంకేతాన్ని ఆపగల శక్తి ఉందని తేల్చారు శాస్త్రవేత్తలు. బ్రెయిన్‌ డెడ్‌ అయినవారి గుండెను దానం చేసే సమయంలోనూ.. ఆ ప్రక్రియ ఏమాత్రం ఆలస్యం అయినా, గుండె దెబ్బతినే ప్రమాదం ఉంది. ఆ సందర్భంలో కూడా Hi1a ప్రొటీన్‌ చాలా ఉపయోగ పడుతుందని చెబుతున్నారు.