సినీ ఇండస్ట్రీ పెద్దగా తాను ఉండబోనని అన్నారు అగ్రనటుడు చిరంజీవి. పెద్దరికం అనే హోదా తనకు ఇష్టం లేదని పేర్కొన్నారు. ఆదివారం హైదరాబాద్ చిరంజీవి బ్లడ్ బ్యాంకులో సినీ కార్మికులకు హెల్త్కార్డుల పంపిణీ కార్యక్రమం జరిగింది. ఈ వేడుకలో చిరంజీవి పై వ్యాఖ్యలు చేశారు. ప్రస్తుతం సినీ పరిశ్రమకు పెద్ద దిక్కు ఎవరూ లేరని, ఆ బాధ్యతను తీసుకోవాల్సిందిగా చిరంజీవిని సినీ కార్మికులు కోరారు. వారి కోరికపై స్పందించిన చిరంజీవి పెద్దరికం అనే హోదా తనకు ఇష్టం లేదని చెప్పారు. ఆయన మాట్లాడుతూ ‘ఇండస్ట్రీకి పెద్దగా నేను ఉండను. ఆ పదవి నాకు అవసరం లేదు. బాధ్యత కలిగిన కళామతల్లి బిడ్డగా కష్టాల్లో ఉన్న కార్మికులను ఆదుకునేందుకు అవసరం వచ్చినప్పుడు ముందుకొస్తా. అనవసర విషయాల్లో తలదూర్చను. వ్యక్తులు, యూనియన్ల మధ్య ఉండే వివాదాలు, తగవులు తీర్చాలని నా వద్దకు వస్తే ఆ పంచాయతీ చేయను. కార్మికుల ఆరోగ్యం, ఉపాధికి సంబంధించిన సమస్యలను పరిష్కరిస్తూ వారి కోసం నిలబడతా’ అన్నారు. కరోనా ప్రతి ఒక్కరి జీవితాలపై తీవ్రమైన దుష్ప్రభావం చూపిందని చిరంజీవి ఆవేదన వ్యక్తం చేశారు. కరోనా వల్ల అరోగ్యం ఎంతో ప్రధానమైనదని సుస్పష్టంగా తెలిసివచ్చిందన్నారు. దానిని దృష్టిలో పెట్టుకొని సినీకార్మికుల జీవితాలకు కాపాడాలనే లక్ష్యంతో ఈ కార్యక్రమాన్ని తలపెట్టామని చెప్పారు.