కల పడ్డది తెల్లారగట్ల..
కోనసీమోళ్లు కట్ట గట్టుకొని
కాళేశ్వరం టూర్కొచ్చినట్లు
కాల్వలు రిజర్వాయర్లు చూసి
అసూయనంతా ఎత్తిపోసినట్లు
బ్యాక్వాటర్లో తెగ సెల్ఫీలు తీసుకున్నట్లు..
కల పడ్డది తెల్లారగట్ల..
రోడ్లన్నీ హరితహారంతో
పచ్చని పొడవాటి జడ వేసుకున్నట్లు
కొమ్మలన్నీ వింజామరలైనట్లు
అటు ఇటుపోయే వాహనాలపై
ఆక్సిజన్ పన్నీరు జల్లినట్లు…
కలపడ్డది తెల్లారగట్ల..
సర్కార్ బడులన్నీ కొత్తగా
సకల సౌకర్యాలతో వెలుగుతున్నట్లు
నల్ల బల్ల డిజిటల్ అయి జిగేల్మన్నట్లు
పేద పిల్లలు ఇంగ్లీష్ రైమ్స్ పాడుతున్నట్లు
కార్పొరేట్ బడులు చాప సదురుకున్నట్లు….
కల పడ్డది తెల్లారగట్ల..
చెరువులన్నీ సముద్రాలైనట్లు
కొంగ బావలన్నీ తిరిగివచ్చి
కొత్తగా కాపురం మొదలుపెట్టినట్లు
తూములకు జలుబు చేసి
జిందా తిలిస్మాత్ అడిగినట్లు…
కల పడ్డది తెల్లారగట్ల..
నల్లగొండ బుద్ధవనానికి
నాలుగు మూలల నుంచి
బుద్ధ భక్తులు బారులు తీరినట్లు
శంషాబాద్ ఎయిర్పోర్ట్లో
విమానాలు ‘జామ్’ అయినట్లు..
కల నిజమే అయింది..!
కచ్చ నేల కనకం అయ్యింది
తెలంగాణ జనం తెగువ
దేశానికి తొవ్వ జూపింది
ఒక్కో పథకం ఫలించి
ఐఏఎస్లకే కొత్త పాఠమైంది..!!
– దాసరి మోహన్, 99853 09080