Visit:
నాతెలగాణ రాష్ట్రము సనాతన కాలమునుండి గూడ దు
ర్జాతుల వారు చేసెడు దురాగత పాపములన్‌ దళించక ని
ర్భీతిగ ఉద్యమమ్ముల నపేక్షిత పోరును సల్పె ఎప్పుడే
రీతులగాని మౌనమును రిత్తగ దాల్చగ లేదు విజ్ఞతన్‌
వీరులకెప్పుడీ పుడమి పేరును గాంచె ననాది నుండియున్‌
పోరును సల్పి స్వేచ్ఛను అపూర్వముగా భువి కాంచ నెంచి యె
వ్వారల శత్రు మూకల రవంత మిగుల్చక పారదోలి యీ
భారత భూమిపై గనె వివర్ధిత స్ఫూర్తి నిరంతరమ్ముగన్‌
తెలగాణన్‌ తమ స్వార్థపూరితపు నిస్తేజంపు వ్యూహమ్ములన్‌
తలపెట్టన్‌ తమ దుష్టభావముల స్వాంతమ్మందు యోచించుచున్‌
మెలగన్‌ జూచెడు వారినోర్చుకొనుచున్‌ మేలందుటల్‌ జేయ నా
ఖలులన్‌ మానసమందు ఓర్చుకొనిరే కాఠిన్యమున్‌ జూపకన్‌
నైజామున్‌ సహియింపకీ జనము విన్నానమ్ము జూపించుచున్‌
తేజమ్మొప్పగ పోరు సల్పిరిట ఆ ధీశక్తులన్జూపుచున్‌
నైజమ్మున్‌ భువి జూపినారిచట సంధానించు వ్యూహమ్ములా
రాజుల్‌ కాలికి బుద్ధి సెప్పి చనగన్‌ రారాజులున్‌ వీరులున్‌
కాకతి వంశధీమణులు క్రాంతిని జూపుచు శత్రుమూకలన్‌
పీకమడంచ గల్గిరి సువీక్షతమౌ తగు పోరుసల్పి ఎం
దాక తెలుంగు నేలది ముదమ్మున నుండెనొ అంతదాక వి
ద్యాకిరణమ్ములుం దగ నయమ్మును పంచుచు నుండి రెప్పుడున్‌
