జాగృతి ఆధ్వర్యంలో రూపుదిద్దుకున్న పాట ఇదే..

అల్లిపూల వెన్నల.. చెరువులోన కురవగా..
పూల ఇంద్రదనసులే.. నేల మీద నిలవగా..
కొమ్మలన్ని అమ్మలై.. వేల పూలు విరియగా..
పుట్ట మన్ను మట్టిలో మట్టి గౌరి పుట్టగా..
అల్లిపూల వెన్నెల.. చెరువులోన కురవగా..
తరలివచ్చె తంగేడు..తనకు పట్టుచీరగా..
రవికలాగా తామరా పువ్వులన్ని మారగా..
తనువుకేమో గుమ్మడి గంధమయ్యే నిలువునా..
పొద్దుపొడుపు దిద్దెనే నుదిటి మీద కుంకుమ..
కూలితల్లి గొంతులో కోయిలమ్మ కూయగా..
తెలంగాణకొచ్చెనే బతుకమ్మ పండుగ..
అమ్మ గుండె గూటికి.. ఆడపడుచు ఆటకి..
గునుగుపూల తోటకి.. ఎనుగు మీద తీగకి..
ఏరువాక ఎదలకి.. ఏటిలోని అలలకి..
కట్ల పూల కళ్లకి.. కానుకయ్యే పల్లెకి..
తరలి తరలి వచ్చెనే బతుకమ్మ
తరగలపై తరలిపోవు తన జన్మ..
మెట్టినింటి పిలుపుతో.. వెల్లిపోయే చెల్లిలా..
జ్లాపకాల బరువులో.. చెమ్మగిల్లె తల్లిలా..
ఆడబిడ్డ చెయ్యిని.. పల్లె తల్లి గడపని..
దాటిపోయి నీటిలో.. ఒదిగిపోయే వేలలో..
సాగనంపి చెల్లెలు.. చెరువు కొమ్ము చివరన..
మరల మరలి రమ్మని.. బతుకమ్మను వీడగా.
అల్లిపూల వెన్నల.. చెరువులోన కురవగా..
పూల ఇంద్రదనసులే.. నేల మీద నిలవగా..
కొమ్మలన్ని అమ్మలై.. వేల పూలు విరియగా..
పుట్ట మన్ను మట్టిలో… మట్టి గౌరి పుట్టగా..

–లిరిక్స్‌: మిట్టపల్లి సురేందర్‌