లక్నో : యూపీలో మహిళలు, బాలికలు, చిన్నారులే కాకుండా వృద్ధ మహిళలకూ రక్షణ కరువైంది. ఫతేపూర్ జిల్లాలో 70 ఏండ్ల వృద్ధురాలిపై ఓ వ్యక్తి లైంగిక దాడికి పాల్పడగా బలియా జిల్లాలో 98 ఏండ్ల వృద్ధ మహిళపైనా ఓ ప్రబుద్ధుడు లైంగిక దాడికి ప్రయత్నించడం కలకలం రేపింది. ఫతేపూర్ జిల్లాలో తరినవ్ పోలీస్ స్టేషన్ పరిధిలో సోమవారం రాత్రి ప్రాధమిక పాఠశాలలో యాచకురాలు (70) నిద్రిస్తుండగా నిందితుడు లక్ష్మి లోధి (32)తాగిన మైకంలో ఆమెపై లైంగిక దాడికి పాల్పడ్డాడు.
పోలీసులు కేసు నమోదు చేసి నిందితుడిని అరెస్ట్ చేశారు. ఇక బలియా జిల్లాలో జరిగిన మరో ఘటనలో 98 ఏండ్ల వృద్ధురాలిపై 22 ఏండ్ల యువకుడు లైంగిక దాడికి ప్రయత్నించగా నిందితుడిని పోలీసులు అరెస్ట్ చేశారు. రస్ధా ప్రాంతంలో ఆగస్ట్ 20న వృద్ధురాలు తన ఇంట్లో ఉండగా సోను అనే నిందితుడు లైంగిక దాడికి ప్రయత్నించాడని తొలుత కేసు నమోదు చేసేందుకు నిరాకరించిన పోలీసులు కుటుంబ సభ్యులు, స్ధానికులు ఆందోళన చేపట్టడంతో చర్యలకు దిగారు.