Visit:
విశ్వక్సేన్ కథానాయకుడిగా రూపొందుతున్న పొలిటికల్ యాక్షన్ డ్రామా ‘లెగసీ’. సాయికిరణ్ దైదా దర్శకుడు. యశ్వంత్ దగ్గుమాటి, సాయికిరణ్రెడ్డి దైదా నిర్మాతలు. పవర్, ఫ్యామిలీ, ప్రేమ, ద్రోహం నేపథ్యంలో రూపొందుతున్న ఇంటెన్స్ పొలిటికల్ డ్రామా ఇదని, తాను కోరుకోని ప్రమాదకరమైన ప్రపంచంలోకి అడుగుపెట్టిన ఓ యువకుడు.. తన తండ్రి గతంలో దాగివున్న నిజాలను ఎదుర్కొంటూ, శక్తివంతమైన ప్రత్యర్థులతో తలపడుతూ.. తన లెగసీ భారాన్ని ఎలా మోశాడు? అనేది ఈ సినిమా కథ అని మేకర్స్ తెలిపారు. ఇప్పటివరకూ చూడని విభిన్నమైన, శక్తివంతమైన అవతార్లో విశ్వక్సేన్ కనిపిస్తారని, ప్రముఖ నటుడు కేకే మేనన్ ఇందులో అత్యంత శక్తివంతుడైన ప్రతినాయకుడి పాత్రను పోషిస్తున్నారని మేకర్స్ చెప్పారు.
ఈ సినిమా షూటింగ్ తుదిదశకు చేరుకున్నది. గురువారం నుంచి చిత్తూరు జిల్లా మదనపల్లె పరిసర ప్రాంతాల్లో నెల రోజులపాటు భారీ షెడ్యూల్ జరుగనున్నది. ప్రధాన తారాగణం పాల్గొనే కీలకమైన సన్నివేశాలతోపాటు భారీ యాక్షన్ ఎపిసోడ్ని, పాటలను కూడా ఈ షెడ్యూల్లో చిత్రీకరించనున్నారు. ఏక్తా రాథోడ్ కథానాయికగా నటిస్తున్న ఈ చిత్రంలో మురళీమోహన్, రావురమేశ్, సచిన్ఖేడేకర్, రాజారవీంద్ర, ఖుషీ రవి, కల్యాణి నటరాజన్, రాజీవ్ కనకాల, అనీష్ కురువిల్లా తదితరులు ఇతర పాత్రధారులు. ఈ చిత్రానికి కెమెరా: జిజు సన్నీ, సంగీతం: గోవింద్ వసంత్.
