Visit:
Nandini | కన్నడ, తమిళ బుల్లితెర పరిశ్రమలో తీవ్ర విషాదం చోటుచేసుకుంది. ‘జీవ హూవాగిదే’, ‘సంఘర్ష’, ‘గౌరి’ వంటి పాపులర్ సీరియల్స్తో గుర్తింపు తెచ్చుకున్న ప్రముఖ నటి నందిని సి.ఎం. బలవన్మరణానికి పాల్పడ్డారు. బెంగళూరులోని తన నివాసంలో సోమవారం ఆమె ఆత్మహత్య చేసుకున్నట్లు కుటుంబ సభ్యులు పోలీసులకు సమాచారం అందించారు.ఈ ఘటనతో ఆమె అభిమానులు, సహ నటులు తీవ్ర దిగ్భ్రాంతికి గురయ్యారు. సమాచారం అందుకున్న పోలీసులు సంఘటనా స్థలానికి చేరుకుని కేసు నమోదు చేసి దర్యాప్తు ప్రారంభించారు. నందిని నివాసంలో ఓ సూసైడ్ నోట్ లభ్యమైనట్లు పోలీసులు తెలిపారు.
ప్రాథమిక సమాచారం ప్రకారం, పెళ్లి విషయంలో కుటుంబ సభ్యుల నుంచి వస్తున్న తీవ్ర ఒత్తిడి, వ్యక్తిగత కారణాలతో నందిని మానసిక ఒత్తిడికి, డిప్రెషన్కు గురైనట్లు సూసైడ్ నోట్లో పేర్కొన్నట్లు తెలుస్తోంది. అయితే విచారణ పూర్తయ్యే వరకు ఆత్మహత్యకు గల పూర్తి కారణాలపై స్పష్టత రావడం లేదని పోలీసులు వెల్లడించారు. కుటుంబ సభ్యులు, సన్నిహితుల నుంచి వాంగ్మూలాలు సేకరిస్తున్నట్లు తెలిపారు.నందిని తక్కువ కాలంలోనే తన నటనతో మంచి అభిమాన గణాన్ని సంపాదించుకున్నారు. ముఖ్యంగా తమిళ సీరియల్ ‘గౌరి’ లో ఆమె పోషించిన పాత్రలు ప్రేక్షకులను విశేషంగా ఆకట్టుకున్నాయి. ఇదే సీరియల్లో ఇటీవల ఆమె పాత్ర ఆత్మహత్యాయత్నం చేసే సన్నివేశం ప్రసారమవడం గమనార్హం. అయితే ఆ సీరియల్ కథకు, నందిని మరణానికి ఎలాంటి సంబంధం లేదని పోలీసులు స్పష్టం చేశారు.
నందిని అకాల మరణ వార్త తెలియగానే సోషల్ మీడియా వేదికగా అభిమానులు, సినీ–టీవీ పరిశ్రమకు చెందిన పలువురు ప్రముఖులు సంతాపం తెలియజేస్తున్నారు. గ్లామర్ రంగంలో ఉన్న ఒత్తిళ్లు, కళాకారులు ఎదుర్కొంటున్న మానసిక సమస్యలపై మరింత అవగాహన పెంచుకోవాల్సిన అవసరం ఉందని పలువురు అభిప్రాయపడుతున్నారు. ఆమెకు తుది నివాళులు అర్పించేందుకు పలువురు సహ నటులు బెంగళూరుకు చేరుకున్నారు.
