Visit:
Tollywood Dancers Association | ప్రముఖ కొరియోగ్రాఫర్ జానీ మాస్టర్ సతీమణి సుమలత నాయకత్వానికి భారీ ఎదురుదెబ్బ తగిలింది. తెలుగు సినీ అండ్ టీవీ డ్యాన్సర్స్ అండ్ డ్యాన్స్ డైరెక్టర్స్ అసోసియేషన్లో నెలకొన్న అంతర్గత వివాదాలు తారాస్థాయికి చేరడంతో, ఫిల్మ్ ఫెడరేషన్ సంచలన నిర్ణయం తీసుకుంది. ఫెడరేషన్ ఆధ్వర్యంలో నిర్వహించిన అత్యవసర సమావేశంలో సుమలత నేతృత్వంలోని ప్రస్తుత కార్యవర్గాన్ని రద్దు చేస్తున్నట్లు అధికారికంగా ప్రకటించారు. దీంతో డ్యాన్సర్స్ అసోసియేషన్ అధ్యక్షురాలిగా సుమలత తన పదవిని కోల్పోవాల్సి వచ్చింది.
ఫిల్మ్ ఫెడరేషన్ పిలుపు మేరకు జరిగిన ఈ కీలక సమావేశానికి సుమలత, రఘు మాస్టర్ వర్గాలతో పాటు దాదాపు 225 మందికి పైగా డ్యాన్సర్లు హాజరయ్యారు. యూనియన్లో నెలకొన్న పరిణామాలు, భవిష్యత్తు కార్యాచరణపై సుదీర్ఘంగా చర్చించారు. ఈ భేటీలో సభ్యులు బలపరీక్ష తరహాలో తమ అభిప్రాయాలను స్పష్టం చేశారు. ఈ సమావేశానికి హాజరైన వారిలో సుమలత వైపు కేవలం 11 మంది మాత్రమే నిలవగా, ప్రముఖ కొరియోగ్రాఫర్ రఘు మాస్టర్ వైపు ఏకంగా 214 మందికి పైగా భారీ మద్దతు ప్రకటించారు.
డ్యాన్సర్లందరి మెజారిటీ మద్దతు రఘు మాస్టర్ వైపు ఉండటంతో, ఫెడరేషన్ పెద్దలు వెంటనే స్పందించి సుమలత కార్యవర్గాన్ని రద్దు చేస్తున్నట్లు తీర్మానించారు. అసోసియేషన్లో ఏకపక్ష నిర్ణయాలు తీసుకోవడం వలనే ఈ సంక్షోభం తలెత్తిందని సాధారణ సభ్యులు ఆరోపించారు. పరిశ్రమలోని అగ్రశ్రేణి కొరియోగ్రాఫర్లు కూడా రఘు మాస్టర్ నాయకత్వానికి పూర్తి మద్దతు తెలిపారు. ఈ పరిణామాల నేపథ్యంలో డ్యాన్సర్స్ అసోసియేషన్కు నూతన నాయకత్వాన్ని ఎన్నుకునేందుకు ఎన్నికల తేదీని కూడా ఫెడరేషన్ ప్రకటించింది. వచ్చే నెల అక్టోబర్ 11వ తేదీన డ్యాన్సర్స్ అసోసియేషన్ నూతన కార్యవర్గానికి ఎన్నికలు నిర్వహించనున్నట్లు స్పష్టం చేశారు.
