Avatar-2 | అవతార్‌-2 మాటల రచయితగా టాలీవుడ్‌ యంగ్‌ దర్శకుడు..!

సముద్ర గర్భంలో జేమ్స్‌ కామెరూన్‌ ఈ సారి ఎలాంటి అద్భుతాలు చూపిస్తాడో అని సినీ ప్రేమికుల్లో క్యూరియాసిటీ క్రియేట్‌ అయింది. అవతార్‌-2 టిక్కెట్‌లు హాట్‌ కేకుల్లా అమ్ముడవుతున్నాయి.

Avatar-2 Movie Telugu Dialogue writer | ప్రపంచ సినీ ప్రేమికులు ఎంతగానో ఎదురు చూస్తున్న ‘అవతార్‌‌-2’ మరో మూడు రోజుల్లో ప్రేక్షకుల మందుకు రానుంది. ఎప్పుడెప్పుడు డిసెంబర్‌ 16 వస్తుందా అని ప్రేక్షకులతో పాటు సినీ సెలబ్రిటీలు సైతం ఎంతో ఆసక్తితో ఎదురు చూస్తున్నారు. ఇప్పటికే రిలీజైన ట్రైలర్‌లు ప్రేక్షకులలో భారీ అంచనాలు క్రియేట్‌ చేశాయి. సముద్ర గర్భంలో జేమ్స్‌ కామెరూన్‌ ఈ సారి ఎలాంటి అద్భుతాలు చూపిస్తాడో అని సినీ ప్రేమికుల్లో క్యూరియాసిటీ క్రియేట్‌ అయింది. ఇక ఈ సినిమా డిసెంబర్‌ 16న ప్రపంచ వ్యాప్తంగా దాదాపు 160 దేశాల్లో ఈ సినిమా గ్రాండ్‌గా రిలీజ్‌ కాబోతుంది. ఇక ఈ మూవీ తెలుగు భాషలోనూ రిలీజ్‌ కాబోతున్న విషయం తెలిసిందే.

కాగా తెలుగులో ఈ సినిమాకు అవసరాల శ్రీనివాస్‌ మాటలు అందించాడట. నటుడిగా, దర్శకుడిగా అవసరాల శ్రీనివాస్‌ టాలీవుడ్‌కు సుపరిచితమే. ఇటీవలే రిలీజైన ‘ఆ అమ్మాయి గురించి మీకు చెప్పాలి’ సినిమాలో డా.వరుణ్‌ పాత్రలో నటించాడు. కాగా శ్రీనివాస్‌కు అవతార్‌ సినిమాకు డైలాగ్స్‌ రాసే అవకాశం రావడం విశేషం అనే చెప్పాలి. ఇటీవలే వచ్చిన ‘బ్రహ్మస్త్ర’ తెలుగు వెర్షన్‌కు కూడా ఆయనే మాటలు రాశాడు. ఈయన సినిమాల్లోని డైలాగ్స్‌ సరదాగా, మన దగ్గరి వాళ్ళతో మాట్లాడే విధంగా ఉంటాయి. అవతార్‌కు కూడా అదే విధంగా  డైలాగ్స్ రాసి ప్రేక్షకులను మెప్పిస్తాడని పలువురు నెటీజన్‌లు కామెంట్స్‌ చేస్తున్నాడు. ప్రస్తుతం ఈయన నాగశౌర్యతో ‘ఫలానా అబ్బాయి ఫలానా అమ్మాయి’ అనే రోమ్‌కామ్‌ సినిమాను తెరకెక్కిస్తున్నాడు.

ఇక అవతార్‌-2 సినిమా రిలీజ్‌కు ముందే వండర్స్ క్రియేట్‌ చేస్తుంది. అడ్వాన్స్ బుకింగ్స్‌తోనే ఈ సినిమాకు కోట్లలో కలెక్షన్‌లు వస్తున్నాయి. అవతార్‌-2 టిక్కెట్‌లు హాట్‌ కేకుల్లా అమ్ముడవుతున్నాయి. కేవలం పీవీఆర్‌, సినీ పోలిస్‌, ఐనాక్స్‌ వంటి మల్టీ ప్లెక్స్‌లలో ఇప్పటి వరకు దాదాపు మూడున్నర లక్షల టిక్కెట్‌లు అమ్ముడయ్యాయి. దీన్ని బట్టి చూస్తే అవతార్ కోసం ప్రేక్షకులు ఎంత ఎదురు చూస్తున్నారో తెలుస్తుంది. ఇంగ్లీష్‌తో పాటు హిందీ, తెలుగు, తమిళ, మలయాళ, కన్నడ భాషల్లో ఈ సినిమా ఇక్కడ రిలీజ్‌ కాబోతుంది.