The Paradise | ఓటీటీలో ‘ది ప్యారడైజ్’.. ఏకంగా 24 నిమిషాల సీన్లు కట్, నెట్‌ఫ్లిక్స్‌లో కొత్త వెర్షన్!

The Paradise | నేచురల్ స్టార్ నాని హీరోగా, దర్శకుడు శ్రీకాంత్ ఓదెల తెరకెక్కించిన చిత్రం ‘ది ప్యారడైజ్’ ఓటీటీ విడుదలకు సిద్ధమైంది. అక్టోబర్ 22న ప్రముఖ ఓటీటీ వేదిక నెట్‌ఫ్లిక్స్‌లో ఈ సినిమా అందుబాటులోకి రానుంది. అయితే థియేటర్లలో విడుదలైన వెర్షన్‌తో పోలిస్తే ఓటీటీ వెర్షన్‌లో ఏకంగా 24 నిమిషాల నిడివిని తగ్గించినట్లు సమాచారం.

The Paradise | నేచురల్ స్టార్ నాని హీరోగా, దర్శకుడు శ్రీకాంత్ ఓదెల తెరకెక్కించిన చిత్రం ‘ది ప్యారడైజ్’ ఓటీటీ విడుదలకు సిద్ధమైంది. అక్టోబర్ 22న ప్రముఖ ఓటీటీ వేదిక నెట్‌ఫ్లిక్స్‌లో ఈ సినిమా అందుబాటులోకి రానుంది. అయితే థియేటర్లలో విడుదలైన వెర్షన్‌తో పోలిస్తే ఓటీటీ వెర్షన్‌లో ఏకంగా 24 నిమిషాల నిడివిని తగ్గించినట్లు సమాచారం. దీంతో ఈ సినిమా డిజిటల్ విడుదలపై సినీ ప్రేక్షకుల్లో ఆసక్తికరమైన చర్చ మొదలైంది. ‘ది ప్యారడైజ్’ థియేట్రికల్ వెర్షన్ సుమారు 2 గంటల 54 నిమిషాల నిడివితో ప్రేక్షకుల ముందుకు వచ్చింది. అయితే ఓటీటీ కోసం సిద్ధం చేసిన వెర్షన్ నిడివి 2 గంటల 30 నిమిషాలకు తగ్గినట్లు తెలుస్తోంది. అంటే థియేటర్లలో ఉన్న వెర్షన్‌తో పోలిస్తే దాదాపు 24 నిమిషాల సన్నివేశాలు తగ్గనున్నాయి.

సాధారణంగా సినిమాలు ఓటీటీలో విడుదలయ్యే సమయంలో కొన్ని సాంకేతిక మార్పులు చేయడం, నిడివిని సవరించడం జరుగుతుంటుంది. అయితే ‘ది ప్యారడైజ్’ విషయంలో ఇంత పెద్ద మొత్తంలో సన్నివేశాలు తొలగించారన్న వార్త ఇప్పుడు చర్చనీయాంశంగా మారింది. ఈ మార్పులతో కథనం మరింత వేగంగా సాగుతుందా? ప్రేక్షకుల స్పందనలో మార్పు వస్తుందా? అన్నది ఆసక్తికరంగా మారింది. సినిమాలోని కొన్ని హింసాత్మక సన్నివేశాలు, కథనం నెమ్మదించే భాగాలను తొలగించడం వల్లే నిడివి తగ్గినట్లు ప్రచారం జరుగుతోంది. కుటుంబ ప్రేక్షకులకు కూడా సినిమా మరింత చేరువ కావాలనే ఉద్దేశంతో ఈ మార్పులు చేసినట్లు కొన్ని కథనాలు పేర్కొంటున్నాయి. అయితే ఈ 24 నిమిషాల కత్తిరింపునకు సంబంధించి చిత్రబృందం నుంచి అధికారిక వివరణ వచ్చినట్లు సమాచారం లేదు.

థియేటర్లలో విడుదలైన సమయంలో సినిమాలోని యాక్షన్ సన్నివేశాలు, నాని పాత్ర చిత్రీక‌రించిన తీరుపై సోషల్ మీడియాలో భిన్నాభిప్రాయాలు వ్యక్తమయ్యాయి. కొందరు ప్రేక్షకులు సినిమాను ప్రశంసించగా, మరికొందరు కొన్ని సన్నివేశాలపై విమర్శలు చేశారు. ఇప్పుడు ఓటీటీ వెర్షన్‌లో మార్పులు చేయడంతో డిజిటల్ ప్రేక్షకుల స్పందన ఎలా ఉంటుందనే ఆసక్తి నెలకొంది. ‘ది ప్యారడైజ్’ తెలుగు, హిందీ, తమిళం, కన్నడ, మలయాళ భాషల్లో నెట్‌ఫ్లిక్స్‌లో అందుబాటులోకి రానున్నట్లు సమాచారం. థియేటర్లలో సినిమా చూడలేకపోయిన ప్రేక్షకులతో పాటు, కొత్త వెర్షన్‌ను చూడాలనుకునే అభిమానులు కూడా ఓటీటీ విడుదల కోసం ఎదురుచూస్తున్నారు.ముఖ్యంగా 24 నిమిషాల సన్నివేశాలు తొలగించిన తర్వాత కథలో ఎలాంటి మార్పులు కనిపిస్తాయి? సినిమా వేగం పెరుగుతుందా? థియేటర్లలో వచ్చిన విమర్శలకు ఓటీటీ వెర్షన్ సమాధానంగా నిలుస్తుందా? అనే ప్రశ్నలు ప్రేక్షకుల్లో వినిపిస్తున్నాయి.