నిప్పులాంటి పోలీస్‌

శ్రీ విష్ణు హీరోగా నటిస్తున్న సినిమా ‘అల్లూరి’. ఈ చిత్రంలో పోలీస్‌ అధికారి పాత్రలో ఆయన నటిస్తున్నారు. లక్కీ మీడియా బ్యానర్‌పై బెక్కెం వేణుగోపాల్‌ నిర్మిస్తున్న ఈ చిత్రానికి ప్రదీప్‌ వర్మ దర్శకత్వం వహిస్తున్నారు. కయాదు లోహర్‌ నాయికగా నటిస్తున్నది. ఒక పాట మినహా ఈ సినిమా చిత్రీకరణ పూర్తయింది. త్వరలో విడుదల తేదీని ప్రకటించనున్నారు. శుక్రవారం ఈ చిత్ర ఫస్ట్‌ లుక్‌ను విడుదల చేశారు.

ఈ సందర్భంగా దర్శకుడు ప్రదీప్‌ వర్మ మాట్లాడుతూ…‘నిజాయితీ గల ఒక పోలీస్‌ అధికారి ఫిక్షనల్‌ బయోగ్రఫీ ఇది. ఎస్‌ఐగా బాధ్యతలు తీసుకున్న తొలి రోజు నుంచి సమాజంలో మంచిని కాపాడేందుకు అతను ఎలా ప్రయత్నించాడు? ఈ క్రమంలో ఉన్నతాధికారుల నుంచి, రాజకీయ నాయకుల నుంచి ఆ పోలీస్‌ అధికారి ఎలాంటి ఒత్తిళ్లను ఎదుర్కొన్నాడు?

విధి నిర్వహణలో అతను చేసిన త్యాగాలు ఏంటి? డిపార్టెంట్‌లో అతనెలాంటి మార్పులు తీసుకొచ్చాడు? అనేది సినిమాలో ఆసక్తికరంగా తెరక్కెకిస్తున్నాం. కర్తవ్యానికి ప్రాధాన్యతనిచ్చే గొప్ప పోలీస్‌ అధికారులందరికీ ఈ సినిమా ఒక అద్దంలా నిలుస్తుంది’ అని అన్నారు. తనికెళ్ల భరణి, సుమన్‌, రాజా రవీంద్ర తదితరులు ఇతర పాత్రల్లో నటిస్తున్న ఈ చిత్రానికి సినిమాటోగ్రఫీ : రాజ్‌ తోట, సంగీతం : హర్షవర్థన్‌ రామేశ్వర్‌.