స్వామీజీల మోసాల్ని చూపించాం!

‘ప్రతీకార నేపథ్య కథాంశంతో ‘తగ్గేదేలే’ చిత్రాన్ని తెరకెక్కించాం. సినిమాలోని పాత్రలు కూడా తగ్గేదేలే అనే తరహాలో ఉంటాయి. టైటిల్‌కు మంచి స్పందన లభిస్తున్నది’

‘ప్రతీకార నేపథ్య కథాంశంతో ‘తగ్గేదేలే’ చిత్రాన్ని తెరకెక్కించాం. సినిమాలోని పాత్రలు కూడా తగ్గేదేలే అనే తరహాలో ఉంటాయి. టైటిల్‌కు మంచి స్పందన లభిస్తున్నది’ అన్నారు శ్రీనివాసరాజు. ఆయన దర్శకత్వంలో నవీన్‌చంద్ర కథానాయకుడిగా నటించిన ఈ చిత్రం నవంబర్‌ 4న ప్రేక్షకుల ముందుకురానుంది. ఈ సందర్భంగా దర్శకుడు శ్రీనివాసరాజు పాత్రికేయులతో ముచ్చటిస్తూ ‘ప్రేమ నేపథ్యంలో నడిచే ప్రతీకార కథ ఇది. ఇదివరకు తెలిసిన కథనే కొత్తగా చెప్పాం. ప్రస్తుతం ఆధ్యాత్మికం అనేది వ్యాపారంగా మారిపోయింది. మనుషుల నమ్మకాల్ని స్వామిజీలు సొమ్ము చేసుకుంటున్నారు. వారి మోసాల్ని ఈ సినిమాలో చూపించాం. సమకాలీన సంఘటనల్ని చర్చిస్తూ సందేశాత్మకంగా సాగుతుంది. ‘దండుపాళ్యం’ తర్వాత నేను చాలా మంది హీరోల్ని కలిసి కథలు చెప్పాను. కానీ ఎక్కడా వర్కవుట్‌ కాలేదు. చివరకు ఈ సినిమా ఛాన్స్‌ వచ్చింది. క్రైమ్‌ థ్రిల్లర్‌ కథగా ‘తగ్గేదేలే’ మెప్పిస్తుంది. ప్రస్తుతం హీరోలకు ఉండే డెమీగాడ్‌ ఇమేజ్‌ తగ్గిపోతున్నది. ప్రేక్షకుల ఊహలకు భిన్నంగా ఉన్న కథాంశాలే ఆదరణ పొందుతున్నాయి. అందుకు ఇటీవల వచ్చిన ‘కాంతార’ చిత్రమే మంచి ఉదాహరణ’ అని చెప్పారు.