నందమూరి తారకరత్న (Taraka Ratna) మరణంతో సినీ పరిశ్రమలో విషాద ఛాయలు అలుముకున్నాయి. తారకరత్న లేడన్న విషయాన్ని కుటుంబసభ్యులతోపాటు చాలా మంది అభిమానులు జీర్ణించుకోలేకపోతున్నారు. కాగా బాబాయి బాలకృష్ణతో తారకరత్న ఓ సినిమా చేయాల్సి ఉండగా.. ఇలా ఆకస్మిక మరణంతో అది కార్యరూపం దాల్చలేదు. ఇదే నెలలో షూటింగ్ ప్రారంభం కావాల్సి ఉన్న ఎన్బీకే 108 (NBK 108)లో తారకరత్న నటించాల్సింది.
ఎన్బీకే 108లో తారకరత్నకు ఓ పాత్ర ఇవ్వాలని బాలయ్య అనుకున్నాడట. తారకరత్నకు నివాళి అర్పించిన అనంతరం డైరెక్టర్ అనిల్ రావిపూడి మీడియాతో మాట్లాడుతూ ఇదే విషయాన్ని చెప్పుకొచ్చాడు. నెక్ట్స్ ప్రాజెక్ట్లో తారక రత్న కోసం ఓ పాత్రను రెడీ చేయాలని బాలకృష్ణ తనకు సూచించినట్టు అనిల్ రావిపూడి చెప్పాడు. ఈ చిత్రం ముందుగా నిర్ణయించిన ప్రకారం ఫిబ్రవరిలో సెట్స్ పైకి వెళ్లాల్సి ఉంది. అయితే తారకరత్న ఆకస్మిక మరణంతో షూటింగ్ వాయిదా పడ్డది.
ఒకవేళ ఎన్బీకే 108లో తారకరత్న నటించి ఉంటే కెరీర్లో చాలా ప్రత్యేకమైన సినిమాగా నిలిచిపోయేదనడంలో ఎలాంటి సందేహం లేదు. అంతేకాదు తారకరత్నకు గ్రాండ్ సెకండ్ ఇన్నింగ్స్ షురూ అయ్యేదని అంటున్నారు సినీ జనాలు. బాలకృష్ణ-తారకరత్న మధ్య మంచి అనుబంధం ఉండేది. అయితే తారకరత్న హఠాత్తుగా ఇలా అందరినీ వదిలివెళ్లడంతో బాబాయి-అబ్బాయిని ఒకే ఫ్రేమ్లో చూడాలన్న అభిమానుల కళ నెలవేరకుండా పోయింది.