Visit:
తమిళ అగ్ర నటుడు విజయ్ సేతుపతి కథానాయకుడిగా, టాలీవుడ్ టాలెంటెడ్ డైరెక్టర్ పూరీ జగన్నాథ్ దర్శకత్వంలో ‘స్లమ్ డాగ్ : 33 టెంపుల్ రోడ్’ చిత్రం తెరకెక్కుతున్న విషయం తెలిసిందే. బలమైన భావోద్వేగాలతో కూడిన పవర్ఫుల్ యాక్షన్ మిస్టరీ కథాంశంతో రూపొందుతున్న ఈ చిత్రం తెలుగు, తమిళం, కన్నడ, మలయాళం, హిందీ భాషల్లో ప్రపంచవ్యాప్తంగా త్వరలో విడుదల కానున్నది. సీనియర్ హీరోయిన్ టబూ ఇందులో కీలకమైన పాత్ర పోషిస్తున్నారు. ఆమె పాత్రకు సంబంధించిన పవర్ఫుల్ గ్లింప్స్ని సోమవారం మేకర్స్ విడుదల చేశారు. ఆద్యంతం స్లమ్ ఏరియా వాతావరణాన్ని పరిచయం చేస్తూ ఈ గ్లింప్స్ సాగింది. అక్కడ కారు దిగి, సిగరెట్ వెలిగించి, పరిస్థితులను తన కంట్రోల్లోకి తీసుకునే డిప్యూటీ కమిషనర్, ఇన్కమ్ట్యాక్స్ గౌరీ హెగ్డేగా టబూ గ్లింప్స్లో కనిపించారు.
స్థానిక గూండాకు చెంపదెబ్బతో వార్నింగ్ ఇచ్చే సన్నివేశాన్ని బట్టి ఆమె పాత్ర ఎంత శక్తివంతంగా ఉంటుందో అవగతమైంది. పవర్ఫుల్ పాత్రలను డిజైన్ చేయడంలో సిద్ధహస్తుడైన పూరీ జగన్నాథ్.. టుబూ పోషించిన గౌరీ హెగ్డే పాత్రను తనదైన శైలిలో ఆసక్తికరంగా తీర్చిదిద్దినట్టు గ్లింప్స్ చెబుతున్నది. సంయుక్త మీనన్ కథానాయికగా నటిస్తున్న ఈ చిత్రంలో దునియా విజయ్ విలన్గా నటిస్తున్నారు. బ్రహ్మాజీ, వీటీవీ గణేశ్ కీలక పాత్రధారులు. ఈ చిత్రానికి కెమెరా: సామ్ కె.నాయుడు, సంగీతం: హర్షవర్థన్ రామేశ్వర్, నిర్మాతలు: పూరీ జగన్నాథ్, ఛార్మికౌర్, జేజీ నారాయణ్రావు కొండ్రోళ్ల, నిర్మాణం: పూరీ కనెక్ట్స్.
