Sreeleela | ఇప్పుడున్న హీరోయిన్లలో శ్రీలీల అంత బిజీగా ఏ హీరోయినూ లేదు. గత ఏడాది డిసెంబర్లో విడుదలైన ‘ధమాకా’ నుంచి ఈ ఏడాది డిసెంబర్లో వచ్చిన ‘ఎక్స్ట్రా ఆర్డినరీ మ్యాన్’ వరకూ పన్నెండు నెలల్లో శ్రీలీల నటించిన అయిదు సినిమాలు విడుదలయ్యాయి. అంటే రమారమీ రెండు నెలలకు ఓ సినిమా అన్నమాట. ఇది మామూలు రికార్డ్ కాదు. పైగా అన్నీ భారీ సినిమాలే. దీన్ని బట్టి శ్రీలీల ప్రభ ఏ స్థాయిలో వెలిగిపోతున్నదో అర్థంచేసుకోవచ్చు.
శ్రీలీల ఎంబీబీఎస్ చదువుతున్న విషయం తెలిసిందే. ఇంత బిజీలో చదువు ఎలా సాగుతున్నది అనేది మిలియన్ డాలర్ల ప్రశ్న. ప్రస్తుతం శ్రీలీల ఎంబీబీఎస్ పరీక్షలు రాసే పనిలోవుంది. ఈ నెల 18 నుంచి 24 వరకూ ముంబయిలో ఎంబీబీఎస్ పరీక్షలు కావడంతో, షూటింగ్లకు బ్రేక్ ఇచ్చి ముంబయి చెక్కేసింది ఈ ముద్దుగుమ్మ. ఈ పరీక్షల్లో ఉత్తీర్ణురాలైతే యాక్ట్రస్ శ్రీలీల కాస్తా డాక్టర్ శ్రీలీలగా మారుతుందన్నమాట. మరి హయ్యర్ స్టడీస్ అంటే మాత్రం ఈ స్థాయిలో సినిమాలు చేయడం కుదిరేపనైతే కాదు. మరి కెరీర్ని ఎలా ప్లాన్ చేసుకుంటుందో చూడాలి. ప్రస్తుతం శ్రీలీల చేతిలో రెండుమూడు సినిమాలు ఉన్నాయి. ఆమె నటించిన ‘గుంటూరుకారం’ సంక్రాంతికి విడుదల కానుంది.