Sree Vishnu | నాలుగు సినిమాలతో బిజీ బిజీగా శ్రీవిష్ణు… విజయాల కోసం కొత్త ప్రణాళిక

Sree Vishnu | టాలీవుడ్‌లో తనదైన శైలిలో నటనతో గుర్తింపు తెచ్చుకున్న హీరో శ్రీ విష్ణు వరుసగా సినిమాలు చేస్తూ బిజీగా గ‌డుపుతున్నారు. ఇటీవల విడుదలైన చిత్రాలు ఆశించిన విజయాన్ని అందుకోకపోయినా, ఆయన మాత్రం వెనుకడుగు వేయకుండా కొత్త ప్రాజెక్టులతో ముందుకు సాగుతున్నారు.

Sree Vishnu | టాలీవుడ్‌లో తనదైన శైలిలో నటనతో గుర్తింపు తెచ్చుకున్న హీరో శ్రీ విష్ణు వరుసగా సినిమాలు చేస్తూ బిజీగా గ‌డుపుతున్నారు. ఇటీవల విడుదలైన చిత్రాలు ఆశించిన విజయాన్ని అందుకోకపోయినా, ఆయన మాత్రం వెనుకడుగు వేయకుండా కొత్త ప్రాజెక్టులతో ముందుకు సాగుతున్నారు. ప్రస్తుతం ఆయన చేతిలో ఏకంగా నాలుగు సినిమాలు ఉండటం సినీ వర్గాల్లో చర్చనీయాంశంగా మారింది. వీటిలో ప్రముఖ నిర్మాణ సంస్థ ‘సితార ఎంటర్‌టైన్‌మెంట్స్’ బ్యానర్‌లో దర్శకుడు సన్నీ సంజయ్ తెరకెక్కిస్తున్న కమర్షియల్ ఎంటర్‌టైనర్ ప్రత్యేక ఆకర్షణగా నిలుస్తోంది. ఈ చిత్రం ఇప్పటికే సగం షూటింగ్ పూర్తి చేసుకుని విడుదలకు సిద్ధమవుతోంది. ఈ సినిమాపై మంచి అంచనాలు నెలకొన్నాయి.

అలాగే శ్రీవిష్ణు కెరీర్‌లో మైలురాయిగా నిలిచిన సామ‌జ‌వ‌ర‌గ‌మ‌న‌ దర్శకుడు రామ్ అబ్బ‌రాజుతో మరోసారి జతకట్టడం విశేషం. ఈ కాంబినేషన్‌లో రాబోతున్న కామెడీ డ్రామాపై ఇండస్ట్రీలో ఆసక్తి పెరుగుతోంది. గత హిట్‌ను దృష్టిలో పెట్టుకుని ఈ ప్రాజెక్ట్‌పై అంచనాలు మరింత పెరిగాయి. ఇవే కాకుండా భాను భోగవరపుతో మరో సినిమా చర్చల దశలో ఉంది. అలాగే రంగబలి ఫేమ్ పవన్ బసంశెట్టి దర్శకత్వంలో ఒక విభిన్న కథా చిత్రం తెరకెక్కనుంది. ఈ సినిమాలు శ్రీవిష్ణు మార్కెట్‌ను మరింత విస్తరించే అవకాశముందని సినీ విశ్లేషకులు భావిస్తున్నారు.

అయితే వరుసగా సినిమాలు చేయడం కంటే కథల ఎంపికలో మరింత జాగ్రత్త అవసరమని ట్రేడ్ వర్గాలు సూచిస్తున్నాయి. ఇటీవల వచ్చిన ఫలితాలను దృష్టిలో ఉంచుకుని, బలమైన కథలు, కొత్తదనం ఉన్న స్క్రిప్ట్‌లను ఎంచుకోవాలని అభిమానులు కోరుతున్నారు. శ్రీవిష్ణు ప్రధాన బలం ఆయన కామెడీ టైమింగ్, డైలాగ్ డెలివరీ కావడంతో, వాటిని సమర్థంగా వినియోగిస్తే మళ్లీ విజయాల బాట పట్టడం ఖాయం అనే అభిప్రాయాలు వ్యక్తమవుతున్నాయి.మొత్తానికి, వైవిధ్యమైన కథలు, వినోదం కలగలిపిన సినిమాలతో శ్రీవిష్ణు మరోసారి బాక్సాఫీస్ వద్ద సత్తా చాటాలని అభిమానులు ఆశిస్తున్నారు.