Ramcharan | మహేశ్ బాబు మేనల్లుడి సినిమాకు రామ్ చరణ్ రివ్యూ..

Ramcharan | కరోనా కారణంగా సినిమా షూటింగ్స్ అన్ని ఆగిపోయాయి. దాంతో మన హీరోలు అందరూ ఇంట్లోనే ఉండిపోయారు. అనుకోకుండా ఖాళీ సమయం దొరకడంతో సినిమాలు చూస్తూ టైమ్ పాస్ చేస్తున్నారు. మరీ ముఖ్యంగా మెగా హీరో రామ్ చరణ్ అయితే తనకు దొరికిన సమయం పూర్తిగా వినియోగించుకుంటున్నాడు. కొత్తగా విడుదలైన ప్రతి సినిమా చూసి సోషల్ మీడియాలో తన రివ్యూ పోస్ట్ చేస్తున్నాడు. మొన్నామధ్య నాని హీరోగా నటించిన శ్యామ్ సింగరాయ్ సినిమా చూసి హీరో హీరోయిన్లను పొగడ్తలతో ముంచెత్తాడు. దానికి సాయి పల్లవి కూడా రిప్లై ఇచ్చి.. మా కోసం టైం కేటాయించినందుకు సంతోషం అంటూ ట్వీట్ చేసింది. తన అక్క సుస్మితా కొణిదెల నిర్మించిన సేనాపతి విషయంలో కూడా ఇలాగే స్పందించాడు రామ్ చరణ్. ఇక ఇప్పుడు మరో సినిమా చూసి సోషల్ మీడియాలో తమ అభిప్రాయాల్ని పోస్ట్ చేశాడు.

మహేశ్‌ బాబు మేనల్లుడు గల్లా అశోక్ హీరోగా పరిచయమైన సినిమా హీరో. శ్రీరామ్ ఆదిత్య తెరకెక్కించిన ఈ సినిమాకు మంచి టాక్ వచ్చింది. అయితే కలెక్షన్స్ మాత్రం ఊహించనంతగా రావడం లేదు. ఇప్పుడు ఈ సినిమా చూసిన రామ్ చరణ్ తన రివ్యూ ట్విట్టర్‌లో పోస్ట్ చేశాడు. అద్భుతమైన పర్ఫార్మెన్స్ తో సినిమా ప్రపంచంలోకి అడుగుపెట్టిన గల్లా అశోక్ కు ఆల్ ద బెస్ట్ అంటూ ట్వీట్ చేశాడు చరణ్. అలాగే నిర్మాతలు పద్మావతి, జయదేవ్ గల్లాకు తన బెస్ట్ విషెస్ చెప్పాడు. దర్శకుడు శ్రీరామ్ ఆదిత్యను ప్రశంసించాడు. రామ్ చరణ్ నుంచి వచ్చిన ఈ రివ్యూ చూసి పండగ చేసుకుంటున్నారు హీరో టీం. తమ సినిమా ప్రమోషన్ కోసం ఇది వాడుకుంటున్నారు. ఏదేమైనా చిన్న పెద్ద అనే తేడా లేకుండా అన్ని సినిమాలు చూసి తన అభిప్రాయాలు షేర్ చేసుకుంటున్నాడు రామ్ చరణ్.